Master

上回有提到，我最近讀緊書。至於讀緊咩！？就又係時候想當年了😅

十年前，姐我還讀緊F.7，當時非常心儀中大的一個科目：Public Health。（唔知點解想讀，就算可能搵唔到工都還是好想讀）當時，我仲係一個好比心機讀書的學生，一心覺得只要肯努力，一定會做到的！最高峰時期，我一日可以溫習16個鐘，為的就是可以讀到呢科。十年前，如果你讚我勤力，我大概都唔會否認，因為我真係花左好多心機讀書（雖然都有經常去午睡💤），Time management都算做得不錯。

奈何，唔係每個付出都一定會有所期望的回報。我A－level最終考得麻麻。勉勉強強，我入左poly BSN，所以成就左今日的一個菇涼。我明白到，有好多事，順其便自然。我亦從果一弈開始，變左一個懶人🐷🐷沒有再努力考高分，沒有好像以前咁抄好多小紙條記日文，沒有睇好多書，亦沒有再好學了。所有事，既來之，則安之。

不過，唔知發咩神經，突然，我又好似想彌補一下遺憾，上網試下報CU Master of Public Health ！點知，又得左喎。我有個老朋友同我講：倔強係不被時間影響的！哈哈！無錯！姐我說到底，還是決定要做我十年前就想做的事！雖然遲到了十年，但我還是做到了！我證明左一樣野：有心唔怕遲！😝結局說不定更好哦！

今年讀呢一科，可算是波折重重。上學期因為逃犯條例被停課過幾次，好多考試都要重新安排。下學期才剛開學無耐，又因為肺炎而被停課。不過，對於慵懶的我來說，咁樣反而令我可以休息下，將d野放慢黎做。而家，無論係條例，或是肺炎，正苦都係做得好差！希望盡快可以：康復香港！時代革命！

求職陷阱 （5）

琴日講到，我又去左見工。雖然懶係諸多挑剔，但世事就係咁，好多野都預計唔到！你明明預左唔會去做的事，但偏偏就係做左。我明明本住hea佢的心態，但我考慮左幾日之後，因為說到底都唔想night，所以我就send左個message比clinic負責人，接受左個offer。同時亦推左HA同private的offers。我當時仲狠狠地自我promised，因為好短時間內試過做唔同工作又或者reject過太多offers。我今次決定左做的話，無論幾難頂，我都至少要做一年，至少等個cv唔好太花。

就係咁，由2018年12月尾開始，我就開始左做一份有小小辦公房的工作了！

－－－－－－－－－－－－－－－－－－－－－－－－－－－－－－－－－－－－－－－－
今日係2020年1月31日，本應我返埋今日又失業了！我有履行我對自己的小承諾，有做足一年以上。點解做得好好地，又突然走佬！？事關我11月份時收到DH的offer call 喇！！！等佢做完reference check我就可以返份多d福利，工時工常d，但人工好鬼低的工了＝＝😖😓

佢又話check一個月如果無問題就正式出offer！我由11月開始，一直等，一直等，就係一直無信！但我2月份學校有考試（有關我讀緊d咩，容後再討論），而我係走晒所有堂🙊所以我2月份一定要失個大業先可以追返進度。就係咁，我就係未正式收到DH offer letter前就resign 左了，今日本是last day。

點解DH咁耐都無offer既！？事關我又遇到求職陷阱呱！？

當時等到12月份時試過打過去DH HR問過，佢話未check完，1月中DH通知我，話我現任雇主的reference check有問題（但無講咩問題），所以要check HA呢個前雇主！下！！！姐係我要重新再等n個月？！難不成是我現任雇主寫左d咩衰野！？😳但我對呢度的寫reference同事好有信心，絕對唔會咁對我架喎！出左咩問題我無深究，但我就知道而家正苦無了期咁停工，我有排都唔會收到offer，分分鐘最後係no offer😨😱但我唔care，無DH offer咪再寫求職陷阱囉！哈哈～有無offer我都想離開下而家份工！都係果句：工時太長！我是屬於自由的🐷

當我歷盡千辛萬苦無論如何有無offer都要resign時，當我自以為定左個完美的時間空檔比自己慢慢溫書考試時，才發現，計劃係永遠都追唔上變化。😐琴日，學校突然宣布暫時停課到2月17日。即是，我由2月開始，又失業，又失學，又唔洗考試住；無口罩的話，街都唔洗出，連旅行都無得去（因為疫情嚴峻），咁同坐監有咩分別！？

今日係我臨收工前3個鐘，我同同事分享我被停課了，失業又失學。佢地竟然問我有無興趣返多一排！？哈哈，就係咁，我又遲多一個月先加入失業大軍了。係呢度返工往往就係咁搞gag，見工又等你通知對佢份工有無興趣，連辭職last day都可以彈出又彈入！

希望呢篇係求職陷阱系列的最終回喇！😂🙊

求職陷阱？（4）

呢篇文早就該係一年幾前寫了，但當時實在太忙，忘記了自己呢度有一個舒發情感的好渠道。嚴格來說，今次都不算是求職陷阱，所以heading有個問號。不過都係同求職有關的事，就好好用呢個系列分享一下喇！

2018年8月，我返緊一份工時理想的工，就係我對上一篇講緊的當時返左幾日果份工作：假期多，人工合理，又唔洗night。不過就是壓力太大，d客太難頂！為左我的精神健康著想，呢份工我先返左一月工，9月份左右，我又失業了。實在好對唔住有份幫我做到呢份工的人。但我更加唔可以對唔住我自己！都唔知係我抗壓能力太低定係我太錫身，總之就是唔會勉強自己去做一d無幸福的野！

失業的生活，實在悶到一個點。我呢個麻煩友，太忙又嫌，太得閒都嫌。當時我好快又煩緊搵工。明明話唔想勉強自己，但我竟然又絕望到決定返ha 或private 果d要night的工作。😖😔人真矛盾！

我分別地係2018年11－12月收到HA同private的offers。我到底對我的人生有幾絕望先會有呢個決定？我好像已經決定賣身比醫院，公立又好，私家都好。總之我就係覺得自己好似只得呢一條路可以行＞＜

當我仲考慮緊去公定私做的時候，我有個大學同學比左個希望我，佢話見到fb有位大學老師問有無人想做clinic？有興趣就留個名比佢。我當時諗，是旦喇，反正都唔知條路點行，咩都試下喇！於是，我就叫左呢位大學同學幫我留左個名同電話比老師（因為我當時無呢位老師的fb）。

無幾耐，我收到一個電話，就係果間clinic的人打來，原來我的聯絡資料被傳左好多個人先傳到去clinic負責人果度。佢係電話度好細心咁講解我需要做的工作，我都覺得幾合適。但我一聽到個工時咁長，有d日子要返9－10個鍾，仲係5天半工作，clinic又離我屋企成1個半鍾車程的距離。聽到都有d暈＝＝！完全不感興趣！本身想直接推左佢，但人地咁詳細介紹份工，又問我想幾時interview，我唔係幾好意思當面拒絕。惟有當比面老師，又懶係當去8下個環境囉。見左人地都唔一定請架嘛。

始終工時太長，距離又遠，加上我當時有d咳唔舒服，interview當天差d就想爽約了。但一諗到應承左人就要去做，免得丟自己和老師面，還是硬著頭皮去了。

interview當天好特別，嚴格黎講都唔知算唔算係interview。我比晒我d cv 同cert佢地留個copy，方便佢地trace返邊個candidates最符合佢地要求，搵工唔係一般都係咁既咩！？點知佢地都只係望左幾眼，比返我，無收起到。（我當時心理嘀咕：難道我未開始見工就已被淘汰了？）當日interview主要係佢地向我介紹工作性質，係佢地講多過我😅😅，其實大部份資訊我都係電話聽過一次，無咩驚喜。但意外收穫係，我得知如果我被聘用了的話，我interview的果間辦公房就是我的私人辦公地方了！聽到好吸引！我可以好像小高層咁有自己的辦公室！😍😍我最記得的係我臨離開的時候，佢地同我講，叫我返去考慮下，如果有興趣返呢份工的話就聯絡佢。嘩！呢個會唔會太搞笑，乜唔係應該佢地考慮完先搵我咩！？我有無聽錯！？呢個仲唔係求職陷阱？

求職陷阱（3）

本來以為我唔會有機會再寫求職陷阱系列的事，好遺憾，又要上載續集。😅

上個禮拜講到我滿心期待過d正常打工仔的生活，唔洗night，唔洗shift，仲可以係中環返工！呢個世界真係所有事情都係有代價的！當你亦以為你已經付出左人工低左幾千元的代價去換取過d正常人生活的時候，你先發覺一切無黎得咁易＝＝我太天真了！

我唔識點樣形容呢份工作，workload大？極受氣？只係知道佢一定唔適合我！我只係返左2日工，心情好depressed，日日都好頭痛（ps，我多數會係用腦過度時頭痛），天氣仲要附和我的心情！嘗試同身邊好多人傾訴，搵d認同感，佢地都只係覺得我唔適應！天呀！我做左廿幾年我自己，難道我唔識分自己唔適應定唔適合！？我的rn生崖有幾個難過的時期：（max5⭑）
1．剛rn staff（2⭑）＜－－試過搵工又請左我，但我無走到。
2．剛去medical（2⭑）＜－－好累，但有一班好同事！係我而家最懷念的地方！
3．剛去某d新ward或新醫院唔適應（1⭑）＜－－無諗過咁快走。
4．呢度（4⭑）＜－－我同事同我講我係打低左好多對手先黎到，究竟呢個employer對我有幾多信任，推薦我黎的人又對我有幾多信心！？我其他的 referee 又幫我講左幾多好說話！？我要拍拍patpat走人真係好容易，即日通知就可以，但我真係唔忍心辜負咁多人的好意！所以我先咁難過！

之前離開HA，就一早同自己講要試晒出面d可能的工作，搵到最comfortable的就留低，而家，我只懷疑我以前過的最harsh的生活，竟然已經係最comfortable！？I can't believe it！我仲可以點算！？我唔想比人有種感覺份份工都做唔長！如果唔係呢份工，我上一份都至少捱到1年！！！嗚嗚．．．跌左落萬劫不復的深淵！

本來仲有好多心情想分享，講講下，又開始depressed天日要返工！又大把氣等緊我去受！我咁細粒人仔都就黎谷爆！抱歉放負太多！

生命太短暫，唔好浪費太多時間係你討厭的事情上面，會後悔的！
Life is too short to waste time!
－－－－－－－－－－－－－－－－－－－－－－－－－－－－－－－－－－－－

回應上一篇：如果比你揀多次，你仲會唔會離開！？＜－－我無預知能力，自己未親身試過唔會知道適唔適合自己；如果我有預知能力，我唔洗揀喇！哈哈～好玄！唔知你明唔明！？

求職陷阱（2）

又係時候分享下我呢排工作上的progress喇！原來上次分享已經係2個幾月前的事喇，都無時間好好交代之後發生的事。哈哈～甘即係證明我一定係有野忙緊先會無時間分享喇！！無錯喇，上次遇上疑似求職陷阱之後，我就去搞清楚件事先做body check。原來，我係好幸運地得到了direct offer，當時的interviewer已經即時決定比offer我的，所以先為我安排body check。而如果我pass唔到body check，又或者如果我做左body check而又考慮完都唔take個offer，總之一日未簽contract，我地雙方都仲可以反口，我都唔洗賠果＄1500 body check fee。我當時又真係諗多左少少＝＝哈哈～危機意識高都算係一件好事黎既！！另外人工方面，搞清楚後發現亦附合我最初預算。所以，6月中的時候，我就正式去左呢間醫院開工喇！

一開初都真係唔係幾適應，畢竟都差唔多成年無開過工，而且private setting真係好唔一樣．．．好彩的係，呢度d人都好好，而且仲有成3個禮拜1：1的preceptorship，令我覺得自己好像返返去學生時期甘！！我以前剛畢業時都未有過甘正的待遇呀！哈哈！所以輕輕鬆鬆地過左頭3個禮拜！我以為自己至少會係度做至少1年先考慮其他出路，畢竟唔想張cv太花，亦唔想辜負當初經理甘爽快就相信我同比offer我！當然亦唔想未過probation而比人罰賠果＄1500 body check fee。睇黎呢＄1500大元真係為我帶來好多困擾！😅

係我preceptorship的最後一日，亦係我第1日係呢度返night的那一日，我有1個interview的機會…大家仲記得我曾經in過第2間的opd無比offer我嗎！？我一直認為係我in得太差，英文太爛而令我錯失了機會。的而且確是有些關係喇！哈哈～但就係因為甘，我有1個更好的interview的機會！當時in我的那位經理pass左我d資料比under呢間醫院的clinic，地理位置比醫院更方便，上班時間更regular！只是人工低少少。我心想：反正我都已經有份工係手，唔等開飯，就去玩玩唄！果然不出我所料，又是全英interview！仲要係外國人！全程都in得太輕鬆，完全係傾計而唔係問醫學問題，而interviewer仲要係英國人，純正英腔真的好好聽！我出其地放鬆，又或者正正因為甘，我又出其地in得好呱！？好好彩地，我今次終於收到呢間醫院的offer喇！！我可以有regular的生活喇！我仲可以係我兒時夢寐以求的中環返工喇！（細個的時候而不是現在）一次過滿足我2個願望！真係好開心！機會真的是直得等待的！

就係甘，我只好辭左返緊的果份工，搞到cv好似花左少少（只是體驗多左少少😜），仲要被罰body check果千幾大元呀！！😅再次被困擾！其實我唔係太介意body check的＄＄，因為呢份工長期開工不足，所以我今次resign被克扣左唔知5日定6日的糧，果筆數仲大＝＝不突止，因為我正直薪酬調整時期resign，連我原本可以加的一千幾百／month的糧都被克扣了！加加埋埋，都應該無左成萬元！果＄1500 body check己頓時變得濕碎＝＝”唔緊要喇！最重要係新工作可以順順利利！甘我呢一切都無悔了！

即使比我選擇多一次，還是一樣。
這2個月的體驗，雖短，卻不枉！

求職・陷阱

又係時候寫下月經文喇！係今次想舒發情感之先，我睇左上一篇的內容，然後又反思左少少，都係出唔到d咩結論。哈哈～我好似慢慢變左小廢青💁又或者已經唔再青春的廢中🙊一個月又過去了，我依然原地踏步，生活好像都唔係起左好大變化．．．

呢個對我黎講係屬於過渡期的5月已經過去了，下一步，應該係我真係要面對現實的時候喇！5月頭，我去左次新加坡，終於可以同我愛人分享我3年前第一次solo travel所去過吃過玩過的野喇！！5月中的時候就去左disneyland住左晚同enjoy 5月天good show！5月尾就係我妹終於要註冊結婚的大日子喇！時日太快！幾個月前我剛到日本先幫左他們完成左個小小求婚儀式，轉過頭，人地倆小口已經成為人妻人夫了！我成個5月都算過得幾充實架！同fd tea過幾次，慢慢培養做運動的習慣，仲有去見過幾次工 ．．．

講到搵工，真係世途險惡！阿姐我對搵工的經驗真係好少，之前大學畢業都只係上網填左份form就入左ha，人工福利果d全部都好透明，我真係唔識玩呢個要bargain人工的遊戲！我天真的以為出面的private人工都好standardised，某個年資對應某個pay。點知我就係甘遇到一個又一個的問題．．．

首先，我主打左2間opd請人的private（因為唔想night），我個expected salary全部都係是但寫同以前一樣的pay。我以為都係主要根據經驗同醫院自己特定的pay scale而定架喇！應該唔會係我話甘少就比甘少既！？點知．．．我收唔到offer都尤是可，收到反而令我有d唔開心！我第一間in的private opd請左我（我in得好差，本身打定輸數），但係出同我要求的pay一樣，仲要無allowance（可能因為唔洗night），變相低過我做ha😅所以，我好無奈地就同呢份工無緣喇！之後同人分享，人地話如果我同hr bargain一下，可能人工會正常返d呢！？哈哈，我真係唔識做呢d，平時買野講價都唔曉，點識呢d技倆，況且當時我都拒絕左嚕！下次要學精d！就係甘，我就少左一個唔洗night的機會喇😌

第2間opd，係一間比較高檔的private，多數係外國客，所以時時刻刻都要講英文，連interview都主要用英文＝＝真係殺我一個措手不及！自問自己英文水平好一般，如果要我日日四萬甘口做事，仲要係講英文為主，我可能真係唔方捱得耐！所以我當時仲好懶清高甘諗：請我都要諗過度過先好制呀！哼～不過到今日為止，都過左一個幾禮拜，我都無收到呢個offer，家下都唔知邊個清高喇！哈哈～真心唔知醜，in到d英文成pat屎甘都好意思期望有offer！況且我個expected salary又係同之前既一樣寫到甘低，即使有offer，我都可能唔會有能力bargain到我真心期望private會出到的果個pay＝＝唉！我真係懶清高！想要幾多咪寫幾多囉！寫到同以前一樣但又期望人地比高d你！真係無果樣整果樣！！！

吸取教訓後，原來都已經無我可以搵的opd喇！！！我惟有搵我做開的medical喇！我去見第3份private時，我好懶醒甘寫左我真正的expectation，點知．．．interview時人地同我講要basic＋allowance＋bonus先有呢條數，問我有無問題，其實我期望 basic＋allowance就應該要有呢條數，但如果加埋bonus先有，我係覺得唔ok的，但懶清高的我當時竟然講無問題！！！我真係痴左線！！！之後，整個interview都好順利，但無話比offer我，只係叫我約一個日子去做body check。點解唔係決定請我先做body check 既！？點解唔係叫我返去等通知先呢！？甘算唔算已經係請左，只不過要pass 個check up！？我好亂！好彩當日已經過左check up的時間，因為個check up 盛惠＄1500。如果請，你要接受offer而且要過probation先可以waive；又或者無offer都唔洗比＄。但係，我而家又未知我個package，如果人地出低價請我都要硬吃！？點解好似少左個step既！？唔係應該講晒offer先做check up咩！？定係assume我已經了解晒呢！？甘都要講下其他benefit 架！eg AL,medical benefit etc．．．我係咪遇上陷阱！？定係我想太多！？哈哈～呢個社會真的不簡單！原來要日捱夜捱的ha可能先係我真正的comfort zone！😅

生活

又有整整一個月無寫下日記喇！日本返黎之後，係hk過左自己的生日，之後又緊接地去左我一直好想去的愛爾蘭旅行。本來都想分享下d旅行見聞，但礙於我實在係太太太懶喇，所以最後都無疾而終了。惟有自我期待我的旅行相冊出爐喇！突然覺得好彩我係日本的呢3個月有一直堅持，好好記錄低左d生活細節，如果唔係我的小腦袋又會忘記左好多值得回味的事喇！

係hk都有hea左大約2個禮拜，雖然中間有返過幾日part time，係始終覺得生活好空虛，好唔實在，原來日日dut係屋企hea仲累過返工！我呢d苦命人，還是早日賜我一份工勞役我吧！我原本的目標係年尾前先正式搵full time，而家按原定計劃的話應該係想先試下唔同part time，再決定自己的意向。不過，犯賤的我，試左幾日part time之後，竟然係好想返一份full time，因為比較有歸屬感，仲要係好想返返去以前好忙的medical開工！甚至開始質疑自己當初點解會為左短短的日本trip而裸辭！？我大概瘋了！我係日本的果3個月係我人生最開心，最輕鬆，最無憂無慮的日子黎架！如果可以，我真係想一直咁樣到永遠！我而家真的是想工作想到瘋了！或者，我想要的不是果種工作的忙同壓力，而係果種工作比我的滿足感，同同事相處的融恰．．．

或者，誇張d講句，我係ha呢個機構工作連同我讀書的placement加埋都有7年幾，我已經唔知出面係咩世界了，只係知道不知不覺間，我原來已經好適應呢種生活了。可能我已經比ha定左形，又或者我只係未遇到更好的．．．

我真的要開始找工作了！雖然我成個5月都有唔同既野要處理，未能夠開到工！但都要開始搵定先！無論係為了生計，為了生活，定係為了生命的意義！更好的，我要來找你了！