求職陷阱（3）

本來以為我唔會有機會再寫求職陷阱系列的事，好遺憾，又要上載續集。😅

上個禮拜講到我滿心期待過d正常打工仔的生活，唔洗night，唔洗shift，仲可以係中環返工！呢個世界真係所有事情都係有代價的！當你亦以為你已經付出左人工低左幾千元的代價去換取過d正常人生活的時候，你先發覺一切無黎得咁易＝＝我太天真了！

我唔識點樣形容呢份工作，workload大？極受氣？只係知道佢一定唔適合我！我只係返左2日工，心情好depressed，日日都好頭痛（ps，我多數會係用腦過度時頭痛），天氣仲要附和我的心情！嘗試同身邊好多人傾訴，搵d認同感，佢地都只係覺得我唔適應！天呀！我做左廿幾年我自己，難道我唔識分自己唔適應定唔適合！？我的rn生崖有幾個難過的時期：（max5⭑）
1．剛rn staff（2⭑）＜－－試過搵工又請左我，但我無走到。
2．剛去medical（2⭑）＜－－好累，但有一班好同事！係我而家最懷念的地方！
3．剛去某d新ward或新醫院唔適應（1⭑）＜－－無諗過咁快走。
4．呢度（4⭑）＜－－我同事同我講我係打低左好多對手先黎到，究竟呢個employer對我有幾多信任，推薦我黎的人又對我有幾多信心！？我其他的 referee 又幫我講左幾多好說話！？我要拍拍patpat走人真係好容易，即日通知就可以，但我真係唔忍心辜負咁多人的好意！所以我先咁難過！

之前離開HA，就一早同自己講要試晒出面d可能的工作，搵到最comfortable的就留低，而家，我只懷疑我以前過的最harsh的生活，竟然已經係最comfortable！？I can't believe it！我仲可以點算！？我唔想比人有種感覺份份工都做唔長！如果唔係呢份工，我上一份都至少捱到1年！！！嗚嗚．．．跌左落萬劫不復的深淵！

本來仲有好多心情想分享，講講下，又開始depressed天日要返工！又大把氣等緊我去受！我咁細粒人仔都就黎谷爆！抱歉放負太多！

生命太短暫，唔好浪費太多時間係你討厭的事情上面，會後悔的！
Life is too short to waste time!
－－－－－－－－－－－－－－－－－－－－－－－－－－－－－－－－－－－－

回應上一篇：如果比你揀多次，你仲會唔會離開！？＜－－我無預知能力，自己未親身試過唔會知道適唔適合自己；如果我有預知能力，我唔洗揀喇！哈哈～好玄！唔知你明唔明！？

求職陷阱（2）

又係時候分享下我呢排工作上的progress喇！原來上次分享已經係2個幾月前的事喇，都無時間好好交代之後發生的事。哈哈～甘即係證明我一定係有野忙緊先會無時間分享喇！！無錯喇，上次遇上疑似求職陷阱之後，我就去搞清楚件事先做body check。原來，我係好幸運地得到了direct offer，當時的interviewer已經即時決定比offer我的，所以先為我安排body check。而如果我pass唔到body check，又或者如果我做左body check而又考慮完都唔take個offer，總之一日未簽contract，我地雙方都仲可以反口，我都唔洗賠果＄1500 body check fee。我當時又真係諗多左少少＝＝哈哈～危機意識高都算係一件好事黎既！！另外人工方面，搞清楚後發現亦附合我最初預算。所以，6月中的時候，我就正式去左呢間醫院開工喇！

一開初都真係唔係幾適應，畢竟都差唔多成年無開過工，而且private setting真係好唔一樣．．．好彩的係，呢度d人都好好，而且仲有成3個禮拜1：1的preceptorship，令我覺得自己好像返返去學生時期甘！！我以前剛畢業時都未有過甘正的待遇呀！哈哈！所以輕輕鬆鬆地過左頭3個禮拜！我以為自己至少會係度做至少1年先考慮其他出路，畢竟唔想張cv太花，亦唔想辜負當初經理甘爽快就相信我同比offer我！當然亦唔想未過probation而比人罰賠果＄1500 body check fee。睇黎呢＄1500大元真係為我帶來好多困擾！😅

係我preceptorship的最後一日，亦係我第1日係呢度返night的那一日，我有1個interview的機會…大家仲記得我曾經in過第2間的opd無比offer我嗎！？我一直認為係我in得太差，英文太爛而令我錯失了機會。的而且確是有些關係喇！哈哈～但就係因為甘，我有1個更好的interview的機會！當時in我的那位經理pass左我d資料比under呢間醫院的clinic，地理位置比醫院更方便，上班時間更regular！只是人工低少少。我心想：反正我都已經有份工係手，唔等開飯，就去玩玩唄！果然不出我所料，又是全英interview！仲要係外國人！全程都in得太輕鬆，完全係傾計而唔係問醫學問題，而interviewer仲要係英國人，純正英腔真的好好聽！我出其地放鬆，又或者正正因為甘，我又出其地in得好呱！？好好彩地，我今次終於收到呢間醫院的offer喇！！我可以有regular的生活喇！我仲可以係我兒時夢寐以求的中環返工喇！（細個的時候而不是現在）一次過滿足我2個願望！真係好開心！機會真的是直得等待的！

就係甘，我只好辭左返緊的果份工，搞到cv好似花左少少（只是體驗多左少少😜），仲要被罰body check果千幾大元呀！！😅再次被困擾！其實我唔係太介意body check的＄＄，因為呢份工長期開工不足，所以我今次resign被克扣左唔知5日定6日的糧，果筆數仲大＝＝不突止，因為我正直薪酬調整時期resign，連我原本可以加的一千幾百／month的糧都被克扣了！加加埋埋，都應該無左成萬元！果＄1500 body check己頓時變得濕碎＝＝”唔緊要喇！最重要係新工作可以順順利利！甘我呢一切都無悔了！

即使比我選擇多一次，還是一樣。
這2個月的體驗，雖短，卻不枉！

求職・陷阱

又係時候寫下月經文喇！係今次想舒發情感之先，我睇左上一篇的內容，然後又反思左少少，都係出唔到d咩結論。哈哈～我好似慢慢變左小廢青💁又或者已經唔再青春的廢中🙊一個月又過去了，我依然原地踏步，生活好像都唔係起左好大變化．．．

呢個對我黎講係屬於過渡期的5月已經過去了，下一步，應該係我真係要面對現實的時候喇！5月頭，我去左次新加坡，終於可以同我愛人分享我3年前第一次solo travel所去過吃過玩過的野喇！！5月中的時候就去左disneyland住左晚同enjoy 5月天good show！5月尾就係我妹終於要註冊結婚的大日子喇！時日太快！幾個月前我剛到日本先幫左他們完成左個小小求婚儀式，轉過頭，人地倆小口已經成為人妻人夫了！我成個5月都算過得幾充實架！同fd tea過幾次，慢慢培養做運動的習慣，仲有去見過幾次工 ．．．

講到搵工，真係世途險惡！阿姐我對搵工的經驗真係好少，之前大學畢業都只係上網填左份form就入左ha，人工福利果d全部都好透明，我真係唔識玩呢個要bargain人工的遊戲！我天真的以為出面的private人工都好standardised，某個年資對應某個pay。點知我就係甘遇到一個又一個的問題．．．

首先，我主打左2間opd請人的private（因為唔想night），我個expected salary全部都係是但寫同以前一樣的pay。我以為都係主要根據經驗同醫院自己特定的pay scale而定架喇！應該唔會係我話甘少就比甘少既！？點知．．．我收唔到offer都尤是可，收到反而令我有d唔開心！我第一間in的private opd請左我（我in得好差，本身打定輸數），但係出同我要求的pay一樣，仲要無allowance（可能因為唔洗night），變相低過我做ha😅所以，我好無奈地就同呢份工無緣喇！之後同人分享，人地話如果我同hr bargain一下，可能人工會正常返d呢！？哈哈，我真係唔識做呢d，平時買野講價都唔曉，點識呢d技倆，況且當時我都拒絕左嚕！下次要學精d！就係甘，我就少左一個唔洗night的機會喇😌

第2間opd，係一間比較高檔的private，多數係外國客，所以時時刻刻都要講英文，連interview都主要用英文＝＝真係殺我一個措手不及！自問自己英文水平好一般，如果要我日日四萬甘口做事，仲要係講英文為主，我可能真係唔方捱得耐！所以我當時仲好懶清高甘諗：請我都要諗過度過先好制呀！哼～不過到今日為止，都過左一個幾禮拜，我都無收到呢個offer，家下都唔知邊個清高喇！哈哈～真心唔知醜，in到d英文成pat屎甘都好意思期望有offer！況且我個expected salary又係同之前既一樣寫到甘低，即使有offer，我都可能唔會有能力bargain到我真心期望private會出到的果個pay＝＝唉！我真係懶清高！想要幾多咪寫幾多囉！寫到同以前一樣但又期望人地比高d你！真係無果樣整果樣！！！

吸取教訓後，原來都已經無我可以搵的opd喇！！！我惟有搵我做開的medical喇！我去見第3份private時，我好懶醒甘寫左我真正的expectation，點知．．．interview時人地同我講要basic＋allowance＋bonus先有呢條數，問我有無問題，其實我期望 basic＋allowance就應該要有呢條數，但如果加埋bonus先有，我係覺得唔ok的，但懶清高的我當時竟然講無問題！！！我真係痴左線！！！之後，整個interview都好順利，但無話比offer我，只係叫我約一個日子去做body check。點解唔係決定請我先做body check 既！？點解唔係叫我返去等通知先呢！？甘算唔算已經係請左，只不過要pass 個check up！？我好亂！好彩當日已經過左check up的時間，因為個check up 盛惠＄1500。如果請，你要接受offer而且要過probation先可以waive；又或者無offer都唔洗比＄。但係，我而家又未知我個package，如果人地出低價請我都要硬吃！？點解好似少左個step既！？唔係應該講晒offer先做check up咩！？定係assume我已經了解晒呢！？甘都要講下其他benefit 架！eg AL,medical benefit etc．．．我係咪遇上陷阱！？定係我想太多！？哈哈～呢個社會真的不簡單！原來要日捱夜捱的ha可能先係我真正的comfort zone！😅

生活

又有整整一個月無寫下日記喇！日本返黎之後，係hk過左自己的生日，之後又緊接地去左我一直好想去的愛爾蘭旅行。本來都想分享下d旅行見聞，但礙於我實在係太太太懶喇，所以最後都無疾而終了。惟有自我期待我的旅行相冊出爐喇！突然覺得好彩我係日本的呢3個月有一直堅持，好好記錄低左d生活細節，如果唔係我的小腦袋又會忘記左好多值得回味的事喇！

係hk都有hea左大約2個禮拜，雖然中間有返過幾日part time，係始終覺得生活好空虛，好唔實在，原來日日dut係屋企hea仲累過返工！我呢d苦命人，還是早日賜我一份工勞役我吧！我原本的目標係年尾前先正式搵full time，而家按原定計劃的話應該係想先試下唔同part time，再決定自己的意向。不過，犯賤的我，試左幾日part time之後，竟然係好想返一份full time，因為比較有歸屬感，仲要係好想返返去以前好忙的medical開工！甚至開始質疑自己當初點解會為左短短的日本trip而裸辭！？我大概瘋了！我係日本的果3個月係我人生最開心，最輕鬆，最無憂無慮的日子黎架！如果可以，我真係想一直咁樣到永遠！我而家真的是想工作想到瘋了！或者，我想要的不是果種工作的忙同壓力，而係果種工作比我的滿足感，同同事相處的融恰．．．

或者，誇張d講句，我係ha呢個機構工作連同我讀書的placement加埋都有7年幾，我已經唔知出面係咩世界了，只係知道不知不覺間，我原來已經好適應呢種生活了。可能我已經比ha定左形，又或者我只係未遇到更好的．．．

我真的要開始找工作了！雖然我成個5月都有唔同既野要處理，未能夠開到工！但都要開始搵定先！無論係為了生計，為了生活，定係為了生命的意義！更好的，我要來找你了！

為日本之旅寫上句號

今日係我呢個日本留學生活的最後一日。寫呢篇野的時候，我仲係身在日本的。再唔捨得，還是有離開的一天。今日天氣好凍，又落雨，加重了離別的情緒。不過，我好快又可以回到家享受歡聚時光，又可以見到大家了！真好！不多説了，回家見！

台場

黎東京之前，有曾經計劃過去台場，雖然明知呢個地方唔算特別吸引，因為覺得好似適合男仔多少少，但就係我其中一個想去的地方。唔知點解，每次準備去之前，都總係有Ｄ阻滯。所以呢２個幾月內我都仲未去到。本來有打算過留返少少想去而又未曾去的地方，好讓我可以快Ｄ有下次的東京之旅。我個ＦＤ知我想去，但佢就對呢個地方無咩好感，即使佢同我講左９萬幾次無咩特別，想令我死心，我都仲係有想去的心。佢最終就決定同我去一次，睇下係佢令我改觀定我可以改變佢的想法。如果佢唔係無喇喇陪我去，大概我今日只係普通的SHOPPING DAY，唔會特登去。

今朝我個ＦＤ臨時約定同我一齊出去，我去左佢屋企附近的商場吃左個迴轉壽司（かいてんずし）名叫はまずし。之後就出發去台場了。黎到，呢度同我想像的一模一樣，唔會話有咩驚喜，但就始終係值得一黎。睇左高達，自由女神像，坐左透明摩天輪，嚇個半餐死，哈哈～總算叫做黎過下。我最後改變唔到我ＦＤ對呢度的感覺，但我都依然覺得無黎過的話係值得黎下既。

I'M READY TO BACK MY HOME SWEET HOME！

日本睇戲

今日要同我roommate正式道別了，突然有種淡淡的失落。以後就無人係我隔離同我吹水，無人挽住我的手一齊出出入入，無人幫我鎖門關燈....今日送左佢入車站後，我地各自講左句好沉重的再見。相信是真的會再見的。
黎日本前一直想住單人房，知道被派到雙人房都有失落過；點知而家發覺隔離無人的感覺更是空虛。有時現實竟然是比想像好！活在當下就好。

之後我就同左個fd出去。我地又去左上野，畢竟上野離我住的地方好近，而且呢度又有好多野可以睇買玩吃。成日都話好想係上野坐鴨仔船，今次終於坐到了。哈哈，好滿足，如果係櫻花期坐就一定更靚！當然人都一定更多！今年睇黎我是剛好錯過櫻花期了，即使今年的櫻花期不停地改早，還是沒緣份。３年前黎東京又是剛好撞唔中櫻花最茂盛的幾日。睇黎要睇漫天櫻花真係可遇不可求！

之後，就終於試左第一次係日本睇戲！點解咁想係日本試睇戲？其實單純地因為想試下聽全日文究竟可以明到幾多。我地選左一套日劇（坂道のアポロン），仲要係無字幕既，完全係大挑戰！哈哈！不過，最後發現竟然都可以明到大概套戲的內容，真係不可思議！睇黎，溝通的最重要橋樑不單是語言，而更大影響的是肢體語言表情，不然我不可能明白咁多內容，因為我根本都唔係聽得明好多！哈哈～係日本，我最唔習慣就係日本人去到邊都好安靜，睇戲靜Ｄ好合理，不過連散場都保持安靜未免太難忍。哈哈～呢樣禮儀真係可愛又可恨！

最終回

今日係最後一日的日文課程了，真的是最後了。我開始後悔點解當初就唔好好決定留耐Ｄ，也許今日就無咁傷心了。不過我是知道的，即使我留多幾耐都好，我始終都是要走的，我都還是要回到去真正屬於我的地方，我家人愛人朋友都在的地方。

今日同平時一樣如常上堂，最後一節課就玩日本CARD GAME。時間過得好快好快，點解我平時上堂就唔覺。真正落堂時，大家都好唔捨得走，影左Ｄ大合照交換下聯絡方式後大家先慢慢散去。有Ｄ要回國的同學哭了，有Ｄ老師也哭了，大家就只是認識了這麼短短的２個多月，感情竟然是那麼的深厚！對！我都一早就開始傷心了，只是沒有哭出來，只是忍住了。這種離別好像是我以前沒有感受過的。大概是因為這種離別有距離，很難再見，也有可能就不會再見了。說著說著，這感覺愈來愈沈重了。為什麼就與我當初黎日本想開開心心識下朋友有咁大分別！？很高興認識大家，但一次過同咁多人別離，我也真的吃不消！惟有相信，會再見的，自然會再見！

本來一直以為一大班同學會約放學後一齊聚會什麼的，就好似之前再分班前咁。點知出奇地今次無。可能大家都趕住第二日回國吧！？真正同大家道別後，我同左個同學去吃左個CAFE，之後還是回家了。回到DORM，感覺特別寂寞，明明時間還早，但就好似所有野都完晒，以後無得上堂，唔洗溫書，唔洗做功課，唔洗備課...感覺好空虛！突然有個同學約我出去慶祝畢業，咁我就好自然地答應了。無論幾夜，始終覺得今日唔應該是這樣係屋企HEA過的！原來佢同我諗法一樣，佢都覺得咁樣分離好寂寞！我地見面後去左上野的一間居酒屋（係日本生活耐左少少，自自然然地愛上左居酒屋，覺得係傾計的大好地方），之後就行下上野公園，玩到都大概終電車先返去！感覺好好，總算填補下以後無得返學無得見大家的空虛！

就係咁，我的日本留學生活就已經結束了。接下來的，就是做好準備回家的工作了。

------------------------------------------------------------------
倘若春春不留白，便留情。
魂牽夢縈，或許，留白更好。

深心情

成日有聽一個講法，就係如果你做每一件事，見每一個人，你都當係最後一次，就自然會珍惜好多，投入好多。對於呢個講法，我一直都好認同，但係要做到又談何容易？明明你就覺得仲有好多個明天，又點會係最後一日？明明有Ｄ野你就日日都做緊，今次又點會係最後一次？不過，萬事萬物總有盡時，只不過你可能成日都會覺得盡頭好遠。

剛來日本時，覺得３個月好長，覺得返學好累，返少一日都無妨。天日，係我係日本的呢個短期課程的最後一個上課天了。真的是最後一天了，我先發現，時間不等人。我心情好複雜！我好唔捨得！唔捨得呢個地方，唔捨得呢Ｄ生活，最唔捨得係呢度的人。人的感情好豐富，一旦產生了，就收不回了。係呢度識的人，朋友，無論係熟既定只係寒暄類別的，我都好唔捨得！究竟係要多大的緣分才能換來同一個班的偶遇！？今次分開了，有的，可能就是一輩子都不可能再遇上了；有的，可能就會陌生了；有的，即使再見感情也可能不一樣了...不只是別人，我也不可能永遠停留在同一點上。明天過後，大家都會四散。感覺同中學大學畢業不一樣，畢竟大家來自五湖四海，分開後，大家就回到世界不同角落，要再見面也不容易。然後，各自各又慢慢重新開展新的心情。到底我應該將呢Ｄ滿滿的感情留晒係度，定係全部在心中帶返屋企？我大概沒有決定權吧？這是心的決定；亦是時間的決定。

明天過後，我大概會明白：不會變的，永遠不會變。

河津櫻之旅

由於就黎要返HK喇，大概要錯過係東京賞櫻的好時機。之前一直見到網上有人講三浦海岸有個海津櫻花祭，而且剛好延長了一個星期，趁住今日係祭典最後一日，即刻安排左今日即使有Ｄ山長水遠都一定要去一次。曾經同過個外國同學講過我想去，點知佢都有興趣，就係咁，我就有個伴喇。

我地約左１０點車站等，總共用左１個半鐘先去到三浦海岸站（みうらかいがん　えき），點知，雖然都仲係櫻花祭典期間，不過可能因為係最後一日，櫻花樹都綠了。噢！難怪咁少人喇！哈哈～山長水遠黎睇河津早櫻（かわずざくら ），點知都謝了...真係明乎其實的等到花兒也謝了！我地真係黎得有Ｄ遲了。唔明點解佢會延長個祭典😓是但喇，好彩我有個伴。之後，我朋友見到附近有個海，我地就去左行了。外國人的方向感真的不得不好好被稱讚一番！隨便睇下GOOGLE就熟晒D路，完全唔洗跟住箭咀行；隨便睇下個影或者星星就知邊邊係東南西北，真係覺得自己好似睇緊外國果Ｄ野外探索電影。

早櫻就係得返呢少少😅

之後，我地就沿住回程路段睇下有咩地方好去。我地去左横須賀市（よこすか），我地係度吃左野，又行左個好舒服的海岸，呢度有好多小小活動，例如釣魚，ＢＢＱ等...我朋友不停話：I love this place！呢度可以見到不遠處又有個小島，好可愛，好寧靜咁，有種令人好想去的感覺。

我地再向前進發，返到去品川。係度，我地玩左保齡球（ボウリング）！對上一次玩真係好耐之前，大概係大學時期呱。今次再係度玩，感覺都唔錯。真係慢慢覺得我好像真係係日本生活的感覺，唔係單純黎旅遊。

我朋友得知我無去過秋葉原，覺得非常驚訝，所以特登要同我去一次。我一直對呢Ｄ動漫的地方唔感興趣，不過黎到又覺得幾得意既，成街都係Ｄ女僕呀COSPLAY呀。係就係得意，但唔會勾起我好大興趣。哈哈～不過我朋友就唔單止係黎睇動漫，亦好喜歡Ｄ小電子產品，高端科技產品...

最後，我地去左上野稍稍行下，吃下野...原來上野公園的櫻花開得仲燦爛過三浦海岸。哈哈～早知唔洗山長水遠去咁遠睇！不過，唔係因為去到咁遠，又何來咁充實的一天呢！？

回家途中先發現原來我地住係同一條鐵道路線上，佢只係住係我後２個站，點解平時返學放學就從來無撞見過！？哈哈～今日又可以順住路一齊返屋企了。滿滿的一日！😜外國人的生活模式同東方人真係好唔同！有機會再好好分享一番！今日我拙劣的英文搞到我條舌頭快不行了😅真的～同時講４種語言大概是我的極限了吧！開始有Ｄ轉唔到CHANNEL的感覺！😵但我又莫名其妙好享受！

日式剪髮

黎日本的其中一個TO DO LIST有剪頭髮呢一項。成日係ＨＫ都話Ｄ咩日式剪髮，日系髮型，倒不如真真正正係日本試剪一次。但係其實我唔係好想染頭髮，因為原本的顏色我已經好滿意，但最後都係決定係度試下有咩唔同喇，當扮下日本妹喇。

今次我同我roommate一齊去佢上次試過的一間，係新宿，好大間，髮型師都好似有十幾個。我地如常係APP預約了時間，嘆左個蟹道樂先上去。

去到，先填左份問卷，然後就被帶左去影左張BEFORE的相，之後就開始好努力同髮型師講我想點搞個頭。我講我想染淺一度的啡色就好，結果我總係覺我係被染左淺一Ｄ的啡色＝＝是但喇！過程中，個髮型師係咁用日文同我吹水，我就好辛苦用盡混身解數同佢傾，佢都好落力用GOOGLE TRANSLATE比我！哈哈～大家都辛苦了。最後，再影左張AFTER的相就完了。第２日可以用ＡＰＰ睇返自己Ｄ相，唔錯唔錯。

總結，日式剪髮無咩特別。唔覺用料比ＨＫ好，亦無焗油呢回事，我加左錢做TREATMENT原來都只係個護髮素療程😓整完頭髮一樣係好傷。但我鐘意佢地有BEFORE & AFTER的相；鐘意佢洗頭會有塊布蓋住我塊面；亦欣賞佢由頭到尾都係同一個人負責搞你個頭，包括洗頭都係同一個人。嗯～

大考

今日係我考初級日語大考的日子。雖說是大考，但唔係本學年最後一個考試，亦唔係最後一日上課天，只是最大型的考試。今日我地一整日都係考試，考足３個鐘。琴日我都有稍稍努力。雖然我以前曾經好自豪地同人講過我大約１０年前學日文時自覺個底打得好好，５０音記得好熟。黎到又唔覺意入左個最初級的日文基礎班，曾經心有不甘，但卻又慢慢發現原來自己無學過的同忘記了的都有幾多...而家我會慶幸自己可以讀初班。今次我肯定是有好好地重新打好個日文底子。哈哈～好多時候個天安排左一樣野比你，如果你覺得唔如意，不妨再耐性少少，結局說不定更如意！

今日個考試學校要求要所有卷分別都要有８０％以上先可以升班，但對於我呢Ｄ唔會再繼續係度升讀的人黎講，咩成績其實影響都唔會大。差再心理上會唔會開心Ｄ。今日主要有３份卷，大概為詞彙，聆聽，文法。
第一份詞彙的卷比較簡單；第２份聆聽，我成日比佢講既廢話搞到我好分心！所以唔係太有信心有８０分以上，第３份文法，雖然一向都是我弱項，但勝在題目多，總有地方可以執分。總括而言，要３份卷都有８０％都真係唔係一件太易的事。又或者係我唔夠努力。是但喇，學習係一件開心的事，唔洗太有壓力～（已經再無升學壓力真係講得輕鬆！）

３月８日婦女（少女）節快樂呀！
（我未婚，所以是少女😚）

小小遊樂場

今日係黎左日本剛好兩個月，但我的小小短期日文課程已經就黎到尾聲喇！成日話黎３個月，以為好長？其實計真Ｄ就只有２個半月，一共７６日，而真正返學的日子就只有四十幾日。而家仲有大約２個零禮拜就要回港了＞＜開始覺得自己未做的事都真係幾多！之前簡單定下的小目標都好似仲有好多未做。嗯～一時三刻就應該好難做得晒，邊個叫自己之前咁懶，成日hea左係ＨＡＬＬ＝＝而家惟有先體驗Ｄ最輕鬆既先喇！

我之前都可能有提過我住的小區唔係遊客區，而成日都本住一顆遊客的心的我，從來都無好好深入探索過我住的附近的小設施。我的朋友話佢以前都住呢區，今日就主動話帶我好好四處逛逛。佢帶左佢的小朋友一齊出黎，我地一齊去左荒川遊樂場。佢小朋友第一眼見我就跑左黎我身邊，哈哈～唔講以為同我好熟，其實佢係第一次見我，之前連相都未睇過。點解佢就對我咁熱情！？佢媽都猜不透。可能我都有小朋友的味道！哈哈～今次如果唔係有個小朋友一齊，我諗我都唔會有可能可以玩到呢Ｄ咁益智可愛的小遊戲。我朋友話以前唔洗排咁耐隊架，不過唔知點解今日就特別多人。呢度真係唔見有遊客的蹤影，感覺好舒服。人多而有秩序！好彩我朋友個Ｂ又乖又有耐性。

玩完之後我地又慢慢地沿步道行出黎。沿途見到好多待開的櫻花樹（而家係枯枝），完全想像到全部開晒可以有幾壯觀！行行下，見到有個神社，好寧靜，好舒服。我地坐底左係度吃下野，吹下水...住左係度２個月，先發現呢個小區其實都真係幾多康樂設施，有Ｄ麻雀雖小，五臟俱全的感覺。好多野都係細細地，不過因為唔會有太多人湧晒去使用，所以覺得好足夠。

之後，小朋友訓左係ＢＢ車，我朋友就可以好方便咁帶佢返去。點知一醒左，就喊住問媽媽點解我唔見左！哈哈～呢個小朋友好SWEET～😝
------------------------------------------------------
（寫於８／３／２０１８）

元宵節

今日係年十五，元宵節喇！新年終於要完了！以前係ＨＫ過新年，可以同愛的人一齊過年，又可以逗下利是，又要去拜年，又可以玩下啤牌，所以總是覺得新年過得好快好充實！最好新年可以再長Ｄ，日日有利是收！😁
不過黎到日本就真係一Ｄ節日氣氛都無！我個心長期都漂左返ＨＫ。眼見屋企人幫我逗左一大堆利是，恨不得快Ｄ飛返去一口氣拆晒佢！呵呵～

今日我如常返學，放學就約左朋友同室友一齊去吃麻辣香鍋。黎左日本咁耐，我有懷疑過我吃最多的唔係日本料理，而係中華菜式。例如：麻辣燙，麻辣香鍋，酸辣粉，老乾媽，涼皮，肉夾饃，煎餅果子...當中大部份我之前都無吃過。哈哈～慢慢係度生活就發覺原來自己無學過做日本人，日文又講唔好。反而混入左中國圈子，身邊大部分都係中國同學，常常一齊吃中式菜，講普通話...而家要我同中國人溝通，我是幾有信心；一但要同日本人對話，我又好似有Ｄ停滯不前。天呀！我究竟係去左邊架！？是但喇，又是開心就好了！

吃完野，有朋友提議打桌球。我咁大個人，竟然以前一次都無玩過＞＜本來唔想玩，亦覺得自己唔會學得識。無諗過原來有人好好咁教我，玩玩下竟然都有少少眉目，都幾好玩架！仲發現左原來係日本玩桌球係平過係ＨＫ架！哈哈！多謝又出錢又要出力教我的師傅！😆

今日學左２個桌球的日文生字
スヌーカー　(Snooker)
ビリヤード　(Billiards)

最後，因為元宵節嘛，當然係自製節日氣氛，去左吃湯圓喇！係日本就係咩都有，只係未必最正宗咁解既姐。中式的湯圓同港式的係湯底上有差別哦！港式係糖水湯底，中式係清水，同行的新加坡人（MIXED中國籍）話佢地係練奶湯底。
 ----------------------------------------------------
（寫於５／３／２０１８）

地震了

係日本生活太悠閒，日日訓到朝早十一點幾先起身，夜晚就玩到一兩點才訓！今日零晨時份，我如常hea到１點幾都仲未訓著，突然張床係咁郁，我仲以為我roommate整蠱我，做咩係咁搖我張床，平時佢都無咁頑皮！？短短１分鐘，我竟然可以諗左千萬個可能性點解張床不停係咁郁，有曾經以為過係自己頭暈，但都無諗過係地震，畢竟無呢方面經驗！直到我roommate終於出聲話地震，我先知我小人之心了！😅

嘩！多多少少都有Ｄ驚，畢竟係自己第一次感受到地震。上網睇一睇，雖然震央係福島５.７級，我身在的位置只感受到兩級的地震，但我已經心荒荒，唔知震幅會唔會變大＞＜大概都震左分幾兩分鐘，終於停左，心都稍稍定左。原來地震的感覺都幾得人驚，雖然你明知身處的呢個位置應該唔大剎傷力，但就係有股力將你係咁推向一個方向。雖然東京只係感受到２級的震動，已經咁有感覺😖真心覺得地震太可怕。亦同時覺得住係ＨＫ無地震真係福地！要常存感恩的心！
--------------------------------------------------------
（寫於４／３／２０１８）

退宿手續

之前一直有心思思想留多３個月係日本好好學習，好好享受悠閒生活，所以成日都有個衝動想問下學校有無學位比我留多３個月。點知我仲未的起心肝去問，學校之前就主動派左張回條比我，問我有無興趣繼續就讀。不過，係度日子待久了，新鮮感開始減退，真的覺得好思念ＨＫ的一切一切，想ＨＫ的美食，生活，家人，愛人...所以，無論再多想好好學習日文，也不及我思鄉來得重要，我還是決定要回家了！

今日正式申請退宿手續了（退宿手續要在退宿前３０天申請才可以收回按金），即代表我逗留在日本的時間正正只餘３０大天了。今日，我又順便交了學校之前給我的回條，正式為我在日留學的去留下了重大的決定！以後想來就再來旅行吧！我倒是覺得要為呢度留返些少神秘感，再留少許曾經在這生活過的親切感，好讓我下次再探索，再回味！

-------------------------------------------------------------

（寫於４／３／２０１８）

橫浜

今日我地由藤沢出發去橫浜都只係大約20分鐘車程，滿心歡喜一去到橫浜（よこはま）站就開始四處搜索我地既目的地——中華街（ちゅうかがい）。哈哈！點知，又係無做任何資料搜集的情況下，我們又撞板了＝＝明明中華街就係橫浜一個好出名的熱點，點解係呢個站一Ｄ指示牌都無！？原來，中華街的確係橫浜呢個地區，但唔係呢個站。我地最後問完路搞清楚後就搭左港未來（みなとみらい）線鐵道去到元町‧中華街站。

黎到中華街，當然係為左中式的食物喇！我地係度吃左個生煎包做早餐，四處走走。之後仲聽到燒炮杖聲！好興奮，雖然只係短短幾秒，但已經好滿足我地想感受少少新年氣氛的願望。吃飽後，就四處走走。呢度有個大海，風景超級靚！感覺好舒服。

再行行下，就到左個遊樂場（COSMO WORLD）。我地其實係衝著個摩天輪黎的，無諗過原來呢度係個遊樂場。黎到呢度，我竟然見到一個十年前係ＡＩＡ玩過的ride——老鼠也瘋狂。其實佢唔係ｄ咩特別的遊戲，只不過我當時覺得佢的名好得意，而我玩完又真係覺好瘋狂，成日好想搵機會encore。一日到黑都同我男友提呢個名，而家總算見到了！但係佢就唔係叫呢個名。是但喇！呵呵～不過今日我無玩，留返下次再黎。今日我地只係玩左摩天輪，無諗過我今次竟然唔驚：）呢度四面環海，真係令人心情得到舒暢！

最後，我地再返返中華街吃多餐就走了。回家的車程本來只需要１個鐘。不過因為我地搭錯左幾次車（多係係因為急行同普通原來有唔同終點站），最終遊左３個鐘車河＝＝途中竟然有日本人問我地路。哈哈～自己都搞唔掂仲好意思幫人😅不過我地應該係無老點人的。仲被稱讚日文講得好！心漂漂然了～呵呵～美好的一天就咁完了！
---------------------------------------------------------------------
（寫於２４／２／２０１８）

鐮倉。江之島

一開學無幾耐開始就同一個同學約定一定要一齊去個２日１夜近郊遊。東京的近郊真係有好多都好正，我地最終都定左呢個鐮倉＆江之島之旅。

約左一大清早就出發去到藤沢(Fujisawa)，之後買左個江之島電鐵一日遊行車劵。第一站係去左鐮倉高校前站，呢個地方就係童年回憶——男兒當入樽的果間學校地點。嘩！一黎到，好有ｆｅｅｌ，好多感覺湧出黎。我地係海邊散步，之後坐左係海灘吃下野。我個ｆｄ拎左個冬甩出黎，問我試唔試下。大家都未開動，就飛來一隻大鷹狠狠地把包給叼走了！嘩！果然快！狠！準！幸好大家都無受傷！我個ｆｄ就一臉茫然，而我就笑左老半天！哈哈～

之後就去左鐮倉(Kamakura)站行。剛好係個神社見到有人結婚。我ｆｄ話要有好運氣先可以見到的。

最後去左江之島(Enoshima)。呢度好靚。我地買左個套票入場。上到去山上，原本應該可以睇到遠處的富士山，不過今日有ｄ大霧，所以唔係好睇到。夜晚的時候上左個塔睇夜景。我地係搭電梯上塔的，落黎時無特別等電梯，直接就行樓梯落黎。不過行落黎條路都幾驚嚇，因為風又大，離地面又高，又無咩遮掩，我都行到有ｄｄ腳軟。不過我地前面個日本人一邊行一邊大叫：怖い！但又無行返入去等電梯，死抓住兩邊扶手叫苦連天。我即刻覺得原來我都表現得幾鎮定。後尾打算落山返去時行錯路，夜媽媽係荒山野領都咪話唔驚！好彩最後都遇到好心日本人指點迷津，我地先安全出到去！

我地今次的兩日一夜小旅行選擇住係藤沢，當初撰酒店的時候一直就只係諗住住係江之島或者係鐮倉，上網搵相關既資料又搵得唔清唔楚，但唔知點解就誤打誤撞選擇住左係藤沢，明明呢度離鐮倉都成半個鐘車程。黎到藤沢呢個站終於明白點解上網都話住呢度方便。哈哈～呢度除左近江之島電鐵近之外，去其他地方都好方便。就係咁，造就左我地天日的橫浜之旅。呵呵～其實呢條江之島電鐵路線仲有好多值得去的地方，不過我地就因為係輕鬆遊，所以無特別一定要逐個check point咁跑，保留少少神秘感，下次再來！

-------------------------------------------------------

（寫於２１／２／２０１８）

無氣氛的大年初一

今日係大年初一，過往咁多年雖然我都唔係一定放假，但點都一定會抽到時間陪屋企人同返大陸探親逗下利是。咁多年黎從黎未試過隻身走到外地過節，真係深深明白到每逢佳節倍思親。而且，係日本係無農曆年的節日的，所以係完完全全地零節日氣氛！本黎想今日走堂慰藉一下我孤獨的心靈，點知適逢學校期中考試，所以惟有係考試中度佳節喇！

放學後同同學吃飯後就一齊去左行上野公園同吹水。呵呵～
---------------------------------------------------------
（寫於２１／２／２０１８）

單身情人節

先一輪講到多年來我男友第一次無我陪佢過生日！今次要講多年來我地第一次唔係對方身邊過情人節＞＜其實情人節對我地黎講唔係Ｄ咩大節日，因為過往多年我地都過得好平凡，同平日無咩大分別，簡單到我考我男友前幾年係點過佢都唔記得！我地一般無大餐，無花，無特別，不過就一定stick together。今次可能因為分隔異地，就會覺得係呢日無得黏在一起好似特別寂寞！

我放學同同學吃左個燒肉就返ＨＡＬＬ了！返到去無耐，突然無喇喇有人狠狠地敲門，我心諗咩事咁大力！一開門，見到宿舍管理員老師同一個日本人企左係門口。老師問我係咪張同學！我話係，之後就比佢教訓左一餐，問我做咩唔聽電話，有人搵左我成日！原來花店個人下午已經不停找我收貨。情人節送花又唔可以話客人唔係度就第二日再黎。送貨員由下午２點找到我７點，最後係透過管理員先搵到我＞＜希望我無害人遲收工喇！難怪我同學話有聽到電話留言話有人搵我，不過佢又聽唔明，我就話我又無買野，應該唔會有Ｄ咩重要野既呱！？原來係我的小男友係個日本網站訂左札花比我！仲留左我同學個電話（因為我無日本電話號碼）。諗住比個驚喜所以無同我講！不過都真係又驚又喜喇！無喇喇比老師嚇一嚇，不過心裹又甜絲絲的！唔好以為我收花當吃生菜！呢次係我第１次收到我男友係情人節送花哦！真係估佢唔到！雖然拍左咁耐拖，收唔收花一Ｄ都唔重要，不過一諗到我男友唔知要查幾多日文字先訂到一札花，我就覺得佢其實都真係幾有我心！好ＳＷＥＥＴ～情人節快樂哦！
------------------------------------------------------------
（寫於２０／２／２０１８）

酸辣粉

琴日先講完要吃中華料理，今日即刻又黎上野喇！今次我地吃酸辣粉，嘩！一吃就要上癮了！我會想常來吃的！說到底我始終鐘情於中式的食物！睇黎如果要我移民都真係有幾大的問題！走的時候買左個淡雪士多啤梨返去吃！日本雖然好多野都好好吃，不過可能ＨＫ始終都係美食天堂，要吃咩國家的食物都好易！生活係ＨＫ真係舌頭有福了！
----------------------------------------------------
（寫於２０／２／２０１８）

壽喜燒

今日係星期一，不過係日本的建國紀念日補假，所以學校都放假一天。我同個ＦＤ一早就約左今日去吃壽喜燒。成日都有聽講，據說幾乎每個日本人的屋企都會有個壽喜燒的爐，不過我倒是唔算太搞得清點先算正宗。今日特登搵左間正宗老店去試了一下——人形町今半。其實味道是不錯，睇佢份量少少的，卻飽到我倆不行了！呢間野可能屬高少少檔次既食店，服務過份好，一入去就逼我地除外套幫我地掛起佢，又有專人一直企係度由頭幫你煮到尾，無離開過，搞到感覺好似３個人一齊吃緊咁，環境又太靜，不敢太大聲講野。總結是其實我地會想自己整多Ｄ，可能會自在Ｄ，妹仔唔慣比人服侍！哈哈～吃完我個ＦＤ既結論係唔夠佢之前吃過的好吃。我是幾鐘意呢種料理喇！下次去試第二家吧！

之後就去左行街：池袋，新宿，原宿，表參道，上野。

最值得一提的是上野有好多中華料理！勾起我好多思鄉的情懷！找天要來吃！
----------------------------------------------------------
（寫於１８／２／２０１８）

日本網購貨到了

今日收到上個禮拜網購的美容機，呵呵～第一次係日本網上買野，又有個地址親自收貨。感覺好好！以後可以多試買。係日本買野除左送貨比ＨＫ慢少少，其他感覺都不錯！不多說了！先去試用了！

---------------------------------------------------

（寫於１８／２／２０１８）

脫睫了

我琴晚訓訓下覺比條假睫毛插左入眼，唉，老是常出現！呢個假睫毛的問題真係天天都多！我發現有Ｄ睫毛係１條假的黏左係２條真既果度，當有一條真的自然脫落，就會一直扯住我眼皮（唔知關唔關我植的時候不停郁，定係佢地技術唔好）。其實到今日為止都只係植左２個幾禮拜，都仲係好好睇（我已適應了）。不過姐我我琴日終於忍唔住，唔想再比佢地折磨，成日篤眼篤鼻，所以把心一橫，夜媽媽１點幾都走起身，用落妝油一直揉Ｄ假睫毛，但都整唔晒出黎，有Ｄ仲係比我強行連根拔起，痛到姐姐不行了！而家Ｄ真假睫毛一忽忽，搞到我對眼騎騎呢呢咁！天日仲要返學＝＝唔知點見人！所以，我連夜搵左個店比我放學後去脫晒Ｄ假睫毛。

放學後，同左個同學去學校附近的CAFE嘆左陣。之後就去睫毛店了。脫睫的時候，我對眼又老是不聽話，不停地郁！不過脫睫毛比較快，所以我都未係好感覺到不適就已經完了！嘩！突然覺得自己對眼好似無睫毛，總覺得以前未植睫毛時好像多少少（錯覺自己是睫毛濃密的豬）。可能我琴日都把真睫毛拔光光了！哎。。。我又要幾耐先適應返呢對咁少睫毛的眼＝＝不管了，自然其實最好看！姐我脫睫了，一身鬆了，爽皮了！
--------------------------------------------------
（寫於１３／２／２０１８）

又要小別了

相聚是為了別離！？好不容易等到我小男友黎探我，才幾天，時間過得太快！而家又要走了＞＜又是這樣，重複１個月前要你與道別的情境！不過，我好像有點點適應這小別（奸笑），可是有經驗了！，沒有再哭慘了。或許，沒我係你身邊日日煩住你，你可以專心做更多事！又更者你樂得清閒！識你十幾年都無見你清閒過～總算機會來了！

就這樣，我們下個月再見囉！
--------------------------------------------------------
（寫於１３／２／２０１８）

LUMINE休息

今日我又逃學一天了，事關我要陪我寶寶shopping。係東京，我地最最最愛行的商場就是.........................LUMINE為名的所有商場，當中以位於新宿的LUMINE EST為之最。呢個商場有好多好適合我地呢個年紀同STYLE既衫，所以行幾多次都唔厭！不過，萬萬都估佢唔到，原來呢Ｄ大商場都會有休息的時候，而好不幸地今日就係佢地大休的日子了～LUMINE旗下大部份商場今日都休息（是商場不是商店哦），包括位於池袋的！唔知係咩原因呢！？残念ですね。仲枉我地特登改左車票換左程早Ｄ返東京都的飛，家下又不能促進消費了！可憐的小ＳＡＭ子好失望呢！有好多野想買都買不成了！不要緊喇！很快又來囉！

輕井澤小店冬日要休息，東京大商場也不例外哦！日本人好懂得平衡作息，好羨慕～

------------------------------------------------------

（寫於１３／２／２０１８）

軽井沢之冬日懶洋洋

今日一早起身搭左新幹線去輕井澤，真的不得不提新幹線真的好貴（來回輕井澤要過萬円）！不過又真係又快又方便既（1個鐘就到）！呢個地方其實ＳＡＭ之前都黎過，不過佢當時就無行晒，所以成日都話要帶我黎睇下。我今日總算有機會黎會一會呢個地方。雖然之前黎係有打算過踏單車，不過由於地面實在太多積雪路面太滑太危險，還是下次有機會秋天黎單車郊遊吧！

一黎到，就覺得真係好凍！普遍都應該負度數，山上好多積雪，所以有大批人黎滑雪！不過我地就無呢個打算！呢度一出站就係PRINCE SHOPPING PLAZA，真係好大好多野買。我都真係有唔少收穫～不過除左行OUTLET，觀光都係我地既重心！所以行左３個鐘左右我地就出發去舊輕井澤銀座通。哈哈！唔黎都唔知點解得咁少店有開門做生意的呢！？原來呢度Ｄ人都幾識享受生活，冬天好多店家都冬眠了！要休息幾個月再開門做生意！哈哈～可能因為天氣真的太凍了吧！其實我倆都快受不了！不過我地又唔會太失望既，隨便一起走走已經好滿足好幸福了！

下一站就真係令我地有少少無奈喇。本來打算去雲場池，就行到之際發覺佢原來工程進行中，無得入去～噢，冰天雪地下我地又白行一趟了！之後我地就一邊行，一邊玩下雪，又一邊凍到震咁返返去OUTLET繼續作戰！之後仲吃左好正既燒肉！９點幾就返返我地既王子酒店了！

下次我地再做足Ｄ功課，呢度係可以秋季再黎賞紅葉泡溫泉的哦！
-----------------------------------------------------------
（寫於１１／２／２０１８）

你終於來了

自從拍拖以來，好似就好少同男友分開咁耐！最耐果次大概係我同一班大學同學去台灣grad trip，我地就因為咁分開左廿幾日。今次黎日本，如果佢抽唔到時間黎的話，我地要分開成七十幾日先可以再見＞＜真係不得了！long D太痛苦！今日，係佢早前決定左出完TRIP之後請幾日假直接飛過黎搵我！呵呵～我地總算可以一解思愁！

佢黎到已經夜晚９點幾。由於明早仲要早起趕車，所以吃左個松屋行左陣激安就返酒店了！

即使一齊左咁多年，依然希望日日黏在一起。
--------------------------------------------------------------
（寫於１１／２／２０１８）

新的一個月開始了

時間開始過得愈來愈快！今日又開始左新的一個月喇！又要面對一Ｄ新轉變！今日要到新的一班上堂，有ＤＤ緊張，唔知會唔會變左孤獨精＞＜.....一返到學校即刻睇下分班結果。ＹＯＹＯ～我可以去到快班呀！總算保留住少少面子！學校將３班人分左２班快１班慢。所以，基本上同學的組合又唔同晒了！同我玩開的同學都仲有１個同我同班，我都總算有個伴＝）上堂小息都可以繼續吹水了！

上一班的兩個負責老師超好人，令我差Ｄ以為呢個現象係ＮＯＲＭ。點知今日一開波上堂，就ＦＥＥＬ到呢個老師好似無咁ＮＩＣＥ。不過都無計！我黎係上堂既，唔係黎比較邊個溫柔Ｄ好蝦Ｄ，最緊要教得明就好了！（當然和藹可親Ｄ既話你返學會開心好多喇）本身教我的果兩位老師都被分到教慢班，搞到我都差Ｄ要埋怨自己點解唔考差少少！（當然是開玩笑的喇）
-----------------------------------------------
（寫於１１／２／２０１８）

又要分班

今日又係考分班試的日子！先剛考完無耐才被分到呢個初級１班。才剛上左３個禮拜的課，而家又話要分個快慢班！快班即是６個月上完整個初級課程，慢班則要９個月！其實對我黎講影響唔會太大，因為反正我３個月後都唔會再繼續上（雖然想但不能），最多都只係學少幾課，唔會拖遲升學計劃。不過，聲稱曾經學過下日文的我已經分到呢個初級班，如果仲要分到個慢班，我諗都幾無面＞＜所以，我都有努力過下，希望今日順順利利喇！

講到又要分班，即是要同呢班同學分開了！雖然大家都只係識左１個月都無，但唔知點解都出好多感情來了！一諗到天日大家都可能係唔同課室上堂，多多少少都有Ｄ唔捨得！況且，我覺得同呢班同學相處得特別融洽，過得好舒服，每日都有滿滿的愛。兩位老師更加係好人到不得了！溫柔到不行！我曾經有傻傻的以為日本就係個個老師都係咁（不過事實就當然唔係咁），就好似日本服務業Ｄ人的質素咁standardized 。總之，我就真係唔捨得大家喇！仲有同我特別玩得埋的中國學生！如果大家唔同班，我就可能又無人同我吹水了＞＜希望總有一個半個玩得埋的人同班喇！好令人緊張～

放學後，成班同學一齊去居酒屋。黎過日本咁多次，從來都無認認真真地去過居酒屋，對居酒屋的形象一直是日本男士下班後消遣的地方，飲酒為主，同ＨＫ蘭桂坊差不多！我地今次去呢間叫魚民，同普通日式餐館無異，不過有大量酒類飲品提供。我總算明白何謂居酒屋，可能我以前都去過唔少，只是無飲酒姐！呢間野都幾正幾有氣氛，又有得唱歌，我地直情當左佢係Ｋ房，不停爭住唱！可以同咁多唔同國籍的人唱Ｋ，聽咁多唔同國籍的歌流行或經典曲，呢Ｄ機會真係唔易有！由於都留左好耐，我唔覺唔覺都飲左３大杯酒類飲品（已經比其他人少），當然是又甜又易入口果種。不過都係一Ｄ　ＦＥＥＬ都無，我隔離個中國同學飲左１杯同我一樣的，已經話好熱好酒味重！好似唔係好頂得順＝＝究竟係我要變小酒鬼還是真的有人係０酒量的呢！？真係唔知喇！

完左居酒屋之後，大家就分道揚鑣喇。我就同左班韓國同學另外去吃拉麵。再之後，佢地話要再去飲熱ＳＡＫＥ！嘩！姐我真的怕怕了！醉了怎麼辦！？況且甜酒我就覺得還好，苦的就應該唔會太享受了！拒絕左佢地之後就回家了！

就係咁，我天日又會面對另一Ｄ人的組合了～
世界一直在轉變～
我，卻好念舊。
-----------------------------------------------------------
（寫於１１／２／２０１８）

河口湖之女

今日我同我好友規劃左去河口湖一日遊。黎東京都一段時間，都一直未見過聞名已久的富士山，總覺得點都要去一去先算黎過東京了吧！？之前一直以為去富士山一定要自駕先方便，無諗過原來搭巴士都好容易又好快，只係大約２個鐘就到，價錢仲比搭ＪＲ平，時間選擇又多，值得一推！

我地一早８點幾就去到新宿車站，時間鬆動仲可以買個小早餐。大約１０點幾就到河口湖。嘩！呢度都真係好靚（雖然好凍）！呢度真係望富士山的一個好理想的位置！一直以為富士山長年都會有雪蓋住，原來自己都有少少無知，係度見到有Ｄ　postcards係完全無上面白色果一截架！雖然上面好高，但都唔係長年冰天雪地，如果夏天天氣暖少少的話上面Ｄ雪肯定會溶晒喇！呵呵～不過我都係鐘意富士山有個白色蓋多Ｄ！有代表性Ｄ！

我地係度買左個套票，包括有觀光巴士循環線任搭，觀光船和纜車。我地先上纜車，呢度睇景都幾正，我地影左一大堆相之後，仲吃左甜既丸子！好幸福！次次黎日本吃親都係醬油味，今次有晒心理準備即使買甜既都可能會有ＤＤ醬油的咸味。但驚喜是無諗過係真既甜架！甜既真係好吃好多囉！

之後去左搭船近少少睇富士山，不過由於凍到我地命都無，所以睇左好短時間我地就入左室內坐了！最後，我地搭觀光巴士隨便下左一個站，點知有意外收穫，就係無意中搵到一個影富士山好靚的地方，而且仲要好少人！即使手指都凍到硬晒，仲係影左不少靚相呢！呵呵～隨心隨意無計劃的小旅行真好！

最後，我地走的時候我諗住把握最後１０分鐘增值下西瓜卡，點知佢吃左我張卡！！！！原來佢部機找＄的時侯比一張唔夠直的＄卡住左了！找唔到＄＄比我仲吃埋我張卡！我搵左個職員，搞左好一陣，我都快急死了！佢仍慢慢修理緊部機＝＝我差Ｄ以為會因為咁而ＭＩＳＳ左架返新宿的巴士了！好彩我地最後衝返去巴士站時發覺原來佢架車有誤點，我地仲等多佢十幾廿分鐘先到！係度真係快到凍死了！返唔成去的話我都唔知可以點算！因為我地連電話都快無電了！＝＝ＨＵ～好險！

返到上野，我地吃左個一蘭，完滿結束充實又快樂的一天＝）
----------------------------------------------------------------------------
（寫於１０／２／２０１８）

AUSTRALIA DAY

今日又係一個考試日！如果唔係我大概會走堂同我好友一齊去遠少少的地方玩！今朝一早我就拎左一袋行李去VICKI的酒店！佢係訂酒店時已經預左係２人房架喇！方便大家之後２日的行程！大家又可以有多ｄ時間相處！好貼心～之後我就去左返學，VICKI就試下一個人的ｓｈｏｐｐｉｎｇ！

我返到課室，有個澳洲同學準備左好多ＣＡＫＥＳ比每個同學。原來今日係オーストラリアの日，哈哈～好有愛！讀呢Ｄ國際班的感覺好開心，邊個國家的節日都可以一齊慶祝，咁就可以日日都有節日過喇，最好日日都放假！


放學，原本一班同學約左去慶祝考完試同週休２日，一齊去居酒屋。不過因為我的好友特登黎左日本陪我，我就當然係好友重要Ｄ喇！唔知點解好似個個國家的人都好鐘意去居酒屋，次次都話izakaya＝＝；定係其實日本的居酒屋真係咁好去呢！？我真係唔係好明！遲下可能會明！

同得我呢個老友一齊，當然又係帶我去增肥，吃左芝士飯！嘩嘩嘩！次次覺得同你一齊一定會幸福肥！成日吃太多好野！我自己就好少搵好野吃！因為我特別鐘意吃的野唔多，吃開鐘意的話就好少試新野，多數一直一直吃同樣的幾款食物，直到再發現新大陸！我係日本呢個月，吃過的好野唔多，無伴的時候好多時都係吃便當，或者自己煮Ｄ　hea野吃咁。當然都有時會嘆下Ｄ小店。係日本一個人吃野好普遍好常見，完全唔會覺得寂寞，毫無遺和感。反而我有時係ＨＫ如果１個人吃野就好唔自在，多數會想盡量外帶！唔知點解呢～
---------------------------------------------------------
（寫於１０／２／２０１８）

寶寶生日快樂

今日是我寶寶男友的生日。咁多年黎(都有十年以上)第一次唔係佢身邊陪佢過生日!佢仲好可憐咁自己一個去左吃粥（應該係，除非唔係）＞＜因為有少少作病。而且又唔敢係呢Ｄ敏感日子同第２個出去！哈哈！好傻！最多我生日同你一齊慶祝返喇！而家比住你一句：生日快樂！我知你唔會怪我的！

另一邊廂，我好友ＶＩＣＫＩ今日黎左日本搵我！好開心！事關佢係第一次自己一個去旅行！就係咁就比左我了！哈哈！太感動！係我黎日本之前，就有傾過會黎搵我玩！當時仲諗住係講下，邊有可能一個未試過自己出遠門的人會為左我而突然勇敢起來！？無諗過佢真係黎左！好叻！每個人為著自己的每一次新嘗試都應該是會有Ｄ　trigger point，而我就成為左別人的其中一個小動力！哈哈！突然好有成就感！

我地今日去左食溫野菜，不過搵路都搵左好一陣子。大家如果黎日本搵我，就應該會開始慢慢發覺我都好似無咩係日本探過路，又或者應該話認路方面都係無進步過～真係唔好對我有太大期望，畢竟我都只係黎左好短時間，況且將一個向無方向感的人放係一個陌生的地方長少少時間就期望佢識飛，咁太講唔通喇！所以結果，可能本來期望要我為佢帶路的人的下場都係要帶返我轉頭＝＝

哈哈！最後，再一次祝我寶貝生日快樂！
亦感到好溫暖我好友的遠道而來！
ＬＯＶＥ　ＹＯＵ　ＡＬＬ！
-----------------------------------------------------------
（寫於１０／２／２０１８）

DisneySea・媒人豬

琴日經過暴風雪後，今日已經不想上學了！哈哈～當然我又唔係咁情緒化的！我琴日放學前已經向老師請左假話今日唔返學，要同我妹佢地去迪士尼玩喇（呢度請假真係易過借火，請假去玩呢d理由竟然係最為常用的！），不過我地就驚大風雪過後可能會去唔成姐！好彩今朝d電車大部分都開返，我地都算好順利咁出到去，只係最後果程車有少少delay，不過不礙事！去到disneysea大約12點！呵呵～人好少，可能大家都有風雪後遺症！我地一共都只係園區留左大約6個鐘連吃野，都玩到有不下十個rides！每條隊都排少過30分鐘，有d仲一去就有得玩！超正！其實我大約3年前都去過disneyland果邊，感覺同hk都幾似，不過呢邊就覺得主要係玩機動遊戲為主，仲好多都好好玩！我呢d唔鐘意刺激的人都覺得恰到好處！值得再去！呵呵～

走人之後返返東京，我地吃左個拉麵之後就上左一棟building影過對面東京站月台！原來都真係幾靚，仲要無咩人！影影下，我妹男友突然叫我幫佢拍低求婚片段！嘩！我都好緊張！咩事先心理準備都無！仲要扮係平時咁幫佢地影相拍片！我一揸電話影相，另一隻手要拍片！果度又唔可以用腳架！我已經覺得我好勁！希望唔好怪我影相影得唔夠好喇！我無諗過我會咁樣見證我妹人生重要的的一刻！我一直以為個個都會喊，不過我呀妹就特別冷靜！但又好滿足！知足的人永遠是最開心的！祝幸福哦！我也功成身退了！

暴風雪

今日係我今次黎東京下的第一場雪，亦是一場暴風雪！
早上大約11點起身，已經看到出面落雪了，不過不太大又沒有積雪，感覺還好。我roommate爭扎了好一陣子，梳洗過，又走返上床，逃學了！我一直堅持住！總無可能為左一場雪而走堂呱！？又咪屈係hall無野做，所以還是上學了！順便感受下今年的第一場雪！
返到學校，我問我同學覺唔覺我整左眼睫毛，佢話我唔講都唔覺，講左都只係似化左妝！我琴日呀妹都係咁講！我心諗：有無整得咁自然呀！？（暗自喜）定係我平時都無人留意咁唔顯眼呢（默默傷心）！？是但喇，只要係natural唔誇張就好了！點知今日老師（中年女人）一入課室，離遠都見到，做晒手勢仲話：アイリスさんいつも可愛いですね！好shyshy！日本人果然咩都好鐘意用可愛い！整睫毛呢家野始終都可能係日本女士的大愛，可能有整過的人一眼就spot到，幾自然都會被發現！呵呵～不過我仲期待緊佢慢慢甩到變返原來咁＝＝家下我都仲唔太習慣！慳左化妝時間但用多左好多洗面時間呢！
放學本來打算出去，不過雪落得超大，地下超濕滑！所以最終都係打算直接返屋企好了！點知殘酷的事發生了！我返屋企的電車停駛了！點算呀！！！！！？我都要瘋了！雖然都仲有巴士行駛，不過我觀察左一陣都無見有車黎過，但條隊就長到不行了！就放棄了等巴士！諗住豪d搭taxi？點知豪得起的人大有人在！條隊仲長過巴士！最終，有個同我住附近的同學找我怎麼打算，我們就決定一起用走的．．．根據google map就話半個鐘返到，不過係呢種暴風雪下，我諗唔止喇！我同學見我就黎比風吹走，就好gentleman咁叫我跟住佢後面。一邊行，一邊去便利店補給下，都搞左成粒鐘先返到。我地原來都係有諗過好多可能性會係用走的返放學，就是都無諗過呢種可能性！好彩我地住的地方都係行到返去，好果唔係都真係要訓街了！舊年既呢個時候我係白川鄉睇緊點燈，都遇上大風雪！無諗過今年又係呢d時候，又係咁！試過就好了．．．太多受不了！

p．s．感激老師上堂派的暖包救了小命！

有朋自hk來

星期日是放假日！今日安氏伉儷黎左東京搵我呢！無諗到我妹一見到我就同我講唔鐘意呢度！又同hk太似！哈哈！我覺得還好！我以前都黎過一次東京，當時感覺都係我最唔鐘意既一個日本地區！果然姊妹血肉相連，感覺一樣呀下！我當時感覺呢度d人相對比較快，又相對其他日本地區無咁友善！不過今次黎唔知係因為我期望低左定點，我覺得d人都好好（之前先有一篇讚完佢地）！我好適應呢個生活節奏，d人都好有禮（除左某d單車人＝＝）！
安氏伉儷本以為我黎左咁耐已經好熟路，實情係我今日先係呢次旅程的第二次去新宿！哈哈！不要期望太多，我平時多數都hea左係hall，唔似大家想像咁生活多姿多彩！好多東京好出名的地方我都未去過，可能我到目前為止去過的地方仲少過果d只黎一個禮拜的遊客lol！遲下我會慢慢發掘多d地方去下架喇！亦會搵多d唔同既好野食下！不過有幾何有人陪我吃！我d同學次次都話約去居酒屋！今日難得有人陪我吃野，我地就去左吃燒肉－－風風亭。嗯．．．下次可以試過第二d喇！哈哈！

 p．s．感激安氏為我帶來了思鄉3寶！

植眼睫毛

今次黎日本之前應承過自己要多試一d自己平時旅行唔會做的事，咁呢趟旅程先會過得更有意義嘛！去到異地旅行，最怕語言障礙！即使黎到日本，即使我學過又學緊日文，但依然係停留係bb班水平，所以同日本人溝通都無話好順暢！不過，總不可能因為你無信心去溝通而咩都唔去試呱！所以，我自己都精選左一d野比自己體驗做日系女仔係點！

首先就係扮靚！經過roommate介紹，黎到日本所有美容服務最好事先預約！所以有個好好用既app推薦比大家！ 就是サロン予約！呢個app堅係好正！可以比你預約剪頭髮，整指甲，植眼睫毛，facial ＆ massage etc．．．

我黎到呢度好早就下載左！（要用日本app store account）。之後就即刻申請左個account！不過，又遇到個小難題，就係我黎到日本之後無一個自己的電話號碼，因為我唔係正式的留學生所以申請唔到，我roommate又未申請！（日本d電話號碼好似特別珍貴，有＄都買唔到咁濟）所以，我roommate比左佢朋友的電話號碼我！哈哈，好多重轉折！不過其實佢唔會特別打比你，又唔會要你收confirmation message，所以我應該都唔係好麻煩到人既呱！？話咁快，就正式做左member喇！

呵呵，我琴日第一次用呢個app喇！琴晚一直諗緊試咩好，搞左好耐，最終決定去試整我之前想整但之後又縮左沙既植假眼睫毛！琴晚搵左好耐，最終決定左一間中型連鎖店pluseye。book既時候又遇到困難了，就係其實都要你睇同填好多資料，而我日文又好有限，所以都查左好一輪字典先搞得掂。book左之後，就正式開始緊張了，因為好驚佢今日問我的問題我聽唔明點算，整出黎唔合心意點算！？佢應該唔expect係做遊客生意架喎！所以，我又下了一番功夫去查佢今日有可能會問我既問題，總算可以係扮靚中學習！唔錯唔錯！

今日正式去植睫毛，一開始要填份問卷，之後傾左陣計，我諗過程中我都只係聽到5成左右，所以有機會我miss左d重要資訊都唔定！不過是但喇！我就選左比較natural的類型。無幾耐就正式開始整了！嘩！睇黎我對眼應該係世上最sensitive架喇，眨到痴左線！我以前都做過電睫毛又係不停眨同流眼水！今次又係咁！不停不受控制咁跳同流眼水！搞到我都好尷尬，好想問佢其他人係咪都係咁，但又唔識問！佢就問左我幾次係咪痛所以喊，我好想同佢講可能係d膠水揮發搞到我好唔舒服！好彩佢手勢好好同好溫柔，所以情況後來都稍稍受控＝＝”
終於整完了，可能我唔慣，又或者我本身睫毛比較少？我覺得有少少誇張！可能我比較少整我d睫毛，平時都好少用睫毛液，多數都只係畫條眼線。所以而家d眼睫毛突然變到咁長同咁濃密真係好唔習慣呢！不過我相信對於d常打扮的人黎講就應該好小兒科！呵呵～

由於我唔係主要想介紹間店，所以我都唔打算整pre ＆ post既效果圖比大家睇！好shy shy！因為我係素顏整架！不過如果大家都有興趣黎日本試整，我倒是可以私人比多d info你睇！因為真係比hk抵！日本人又唔會sell你！又唔洗買package！呵呵！比個預算大家，我今次做左個中價位的120條，大約＄hkd420左右喇！不過我就應該唔會再有下次喇！因為真係好唔慣自己個樣咁唔自然！同埋過程有d辛苦！（相信主要係對我黎講，如果對眼唔係好似我咁不由自主眨的人呢個過程應該真係可以訓得著！因為個技師其係好溫柔！）

好喇！下次再同大家分享d日本生活小體驗喇！

Happy Friday

當習慣左呢度的生活，時間好似過得愈來愈快。好似前兩日先講完有Monday Blue, 話咁快又到星期五了！雖然黎呢度的時間好短，都應該多花心思係學習上，應該好期待返學至係。可惜人總是有惰性，更何況我自覺懶惰因子太過dorminant！日日都在期待放假！如果你問我放假有咩目標？嗯．．．其實就無太明確的明標！倒只是想找多d日本的野黎試下！什麼都好，有益就好！呢個週日可是有人會從hk過黎搵我玩！呵～如果你想我介紹東京的好東西比你！那我倒暫時未開始去發掘，不過勉強還是可以帶你去shopping，這可是姐我在東京暫時最愛做的事情！

今日派左琴日考試的卷了！呵呵～總算無辜負我的用功！我可是滿分的好寶寶！（全班得2個滿分架咋！）雖然就唔算係d咩大成就，可我就是為著呢小小事而開心上一整天！好似以前讀書時期考試考到好成績咁！以前中學的時候總想快d升大學！因為讀書好大壓力；大學又想快畢業，因為實習無＄！返工之後就自然明白，做學生多好！年輕多好！我黎呢度既其中一個原因也不過是為了當回一個學生。而家雖然感覺好似，可有些事都回不去了！惟有好好珍惜而家呢d日子，活在當下喇！

耳濡目染？

今日的考試比我想像的簡單好多，原本以為佢要我地看圖背默詞語，點知原來老師會每幅圖都讀2次出黎，難度大大減少了。真可惜！我琴晚好努力記的都用不著了！不過也算了，反正本來要學好日文的話就應該多背一下嘛！即使我一早知係seen dictation形式，我都一樣會背，不過可能會無咁刻苦囉！呵～（偷懶mode啟動！）

今日放學同一個中國籍女同學一齊放學，呢位同學原來嫁左黎日本4年了，不過由於老公不是日本人，所以平常日常溝通都用普通話。佢而家係我同學，我感覺好奇怪，因為覺得佢黎左日本咁多年，你唔洗學都應該會耳濡目染呱！？事實話比我知唔係架，即使比你生活係果個環境，你無心學一樣唔會學得識。呢個世界也真的沒有免費午餐，唔會有咁荀放你去果度你就自然會識！所以我還是得用心學習，不然黎日本學同係hk學就沒有分別了！

返到hall附近，我又遇到另一個中國男同學（我班上也只有2個中國籍同學），佢就住係我附近，不過不是hall。佢同我介紹附近一間比較大型的超市，我就跟住佢，又買了一大堆吃的東西！住左係度咁耐都係第一次知有呢間超市，點解我好似次次都要人帶我去我先知！？我真的要好好學識自己explore一下！邊度都好！買完野之後我就帶佢去我僅吃過附近的一間餐館一齊dinner。

－－－－－－－－－－－－－－－－－－－－－－－－－－－－－－－－－－－－－－－－

日本小知識，可能你都識。

我今日同同學交流時得知原來係日本買iphone x係全球最平的！！！不過就有一個缺點，就係影相聲唔可以mute。原來日本人為左防止人偷拍，所有電話影相都會有聲。最多都只可以較細聲，無得靜音！噢！残念ですね！

準備考試囉

明天係我第一次係呢度既考試，所以今晚都有好努力的溫習。久違了的小用功！天日的考試主要係考d 詞語，大概都有過百個，不過就因為我之前有學過下，我唔識既大概少過廿個。就住呢百零個詞語，我可是都溫左1個半鐘！感覺是不容有失！我都叫做係學左好幾年，點可以比幾個n5的詞語難到！？所以我目標可是set得很高的！正常黎講我黎呢度既理由最弱，因為不是為了升學什麼的，理應最hea的，不過呢個關係到面子問題！所以還是該好好努力一番！好了！祝我成功吧！

生活用品買買買

今日放學去左池袋又買生活用品，買極都未完，講緊既已經唔係消耗品，而真係非消耗性的必須品！今日買既係一個水煲！之前剛黎的時候買左一個一人鍋，諗住佢係多用途，煮飯可以，煲水也可以！點知就廢到無朋友！煲個水（500ml）大概都要廿幾分鐘！更唔好講想係房煮食了！我而家每次都係拆開佢拎出去用明火煲，煩死人了！所以，還是小水煲實際！而家4mins就搞定了！呵呵！我又可以吃泡麵了！

今日放學剛好同一個韓國同學一齊走，一開頭寒暄左幾句之後就dead air了，唔係因為我地無話題，而係用日文真係對唔上咀！佢識既我又唔識，我識既佢又唔識！又唔知係大家發音問題定咩，總之我就聽唔明佢up乜！不過強行講左幾句日文之後，終於發現原來佢識英文，唔係識少少果種，係好流利果種，因為佢係美國讀過幾年書。太感動了！之後我地就終於轉channel喇！哈哈！乜我唔係黎日本學日文既咩！竟然對日文恐懼！？一遇到講普通話同英文既人都特別想同佢傾幾句！（暫時無遇過可以同我講廣東話的人）一遇到有人同我講日文我就比有十個問號的表情比佢！我到底諗緊乜！？

Monday blue

以前返工的時候日日都倒瀉籮蟹咁忙，所以日日都blue架喇，理得你星期一定七。不過，自從做返學生之後，有正常返學休假時間，好自然就會期待星期五六日，我相信好多正常返工的打工仔都應該會係咁。
當個個都以為我係呢邊會努力學習的時候，我卻發現原來我做唔返好似中學時期乖乖上學的好學生了。以前中學返努力讀書為左上大學，目標明確，所以朝住目標就可以跑了。而家，無論我學得好唔好，比我考到100分都好，都好似無咩分別。我又唔洗升班，3個月後就可以拍拍patpat走人了。所以，我而家好似係一個壞學生，返學諗放學，返學途中竟然都想走堂！因為Monday真係好blue架，仲有5日先放假！！！有時會覺得太regular的生活好似唔係太適合我，比多d變化我可能又會有多d色彩！當然最後我都係乖乖上堂了，姐我來日本不是為了走堂的！這可能就是我的目標。

視察環境

今日又係放假日，本打算好好利用一番，出去shopping下，補給下d生活必需品等（唔知點解永遠買極都唔會夠＝＝）。不過，由於起身起得太遲，沖完個靚涼加嘆埋個早餐都成1點。東京呢邊4點幾就天黑，唔知係咪因為因為冬天夜長日短定不嬲都係咁，所以如果我而家先出去，天太黑先返又好似唔係幾好，始終我都未好熟呢邊d路同環境，所以今日即使出去都唔打算去太遠了。
我roommate見我想出去買野，主動提議帶我四圍視察下同埋去super market＆100 円店。哈～平日我返學又唔會早起身，放學又已經天黑，唔敢亂行無咩人的地方，我都係直到今日先叫做正式係附近視察過，又對呢個小區了解多左喇！其實行左好短時間，返到hall又天黑了，真快！
之前成日都話想住1人hall，多d自由。但我而家發覺如果我真係一個人住，除左平時無人同我傾計之外，最重要係好多野都無人可以近身幫到我。我黎到呢度又唔知垃圾點扔，唔知微波爐點用，唔知有信箱，唔知電費點交etc．如果唔係有個伴，其實都幾無助！不過你都可以話無人比我依賴或者更加可以成長！又或者其實只係我好彩遇到個樂於助人的roommate！anyway，人總係需要朋友，如果你話有人照住我，我就好難成長的話，那我不要長大好了，反正我也剛好不想長大，只想長高！哈～

營養不良

今日係學校放假的日子！今早有同學傳信息問我今日要唔要返學，搞到我都打個突，差d以為我搞錯了！有得放星期六日假的日子好幸福！我以前要返工的時候都特別想放星期六日，好像全世界人都同你一齊放緊假咁。
好多人都以為我係呢邊好吃好住，不過事實係我住係hall，感覺有d似hostel，廚房廁所洗澡洗面都要走出去，仲有dd遠。不過好彩的係我roommate特別好，生活習慣什麼的都同我好相似，對我又好遷就，令我覺得好好依賴呢！不過佢其實係日本黎講仲未成年，竟然係我依賴的好對象！姐不是應該要好好照顧一下小妹妹至係的嗎！？難怪我都比朋友串依賴無分年齡國籍！哈哈！
吃方面問題更大了，識我的人都知道我唔吃生野，所以其實黎到日本呢邊都唔係話樣樣野都岩我吃。加上我住的地方又唔係遊客區，唔算好多食店，所以好多時都係自己煮。我就唔係唔識煮，不過就無好好的工具，食材方面又好難準備1人的。所以成日都hea煮個麵就算了。為左唔想煮，有時落堂我都故意約人吃飽先返黎又或者買便當就算了！點算！我有d掛住hk既美食呀！！另外，由於我係下午班了，每日10點起身，11點幾吃早餐，12點出門，1點上堂，4點半落堂，再吃dinner就完了。每日吃得果2餐，姐我不刻意減肥都營養不良了！這時候我又比人串：無聽過有人黎日本係會瘦的！＝＝

日語變國語？

今日繼續同50音作戰，根據學校的時間表，平片假名大概要玩到1月尾＝＝

我而家返學的重心好似放左係吹水大會。一放break就可以同唔同國籍的人傾計，有時就好似雞同鴨講咁，感覺幾好笑，加小小大家僅有的日文底子就成事了！班上面佔最多係韓國人，不過我就覺得同韓國人傾計最困難。今日加左幾個韓國人的line，不過佢地的帳號都係韓文，我都唔知邊個打邊個，哈哈～之後佢地教返我讀，不過全部都係圈圈棟棟，教完都唔會記得：）比堆拼音我都讀到亂七八糟。哈～是但喇！反正3個月後我相信我會記得晒大家的名架喇！

琴日有人同我反映我而家寫日記的風格好似有少少變左！你以為我而家想盡量寫得書面語一d？唔係！其實我覺得用口語寫係會更加傳神！不過我而家每日對得最多就係roommate，所以咪日日都好似係度練習緊普通話咁囉。加上最近追緊套大陸劇－－致我們單純的小美好，搞到自己都用左果個語言思維諗野同寫野，仲用晒果d國語助語詞咁囉！

而家搞到我日文又學唔成，反而變成黎日本學國語了！＝＝

第一日正式上課

今日係第一日正式返學的日子！好緊張期待哦！
我和同房都是下午班的。她說平時一般都會早一個鐘出門口返學，好似早得好誇張！不過第一日就是但喇！返到去原來都只係早左20分鐘左右，都唔係好誇張姐！
第一次同咁多唔同國籍的同學一齊返學，好新奇有趣！雖說是初級1班，但原來個個已經有日文底子。今次要由最基本的大家的日本語50音學起，有d同學都表露有少少不太情願的樣子，我起初都不太想重新學あいうえお，鬼叫學校政策就係咁，不過就覺得幾簡單的都應該有學習位呱，就當再補補底好了！反正學得簡單一點，就當放空一下腦袋吧！我也得好好享受全職做學生的日子！也是我全職吃喝玩樂的日子！

分班結果

今日中午是分班放榜的日子，明天才正式上課。我同房同我講原來舊生今日就開始上課，所以佢話幫我睇分班結果。一睇．．．真係無眼睇！竟然係初級1班，即是最低班！咩料子！姐我無諗過學了好幾年日文，本打算黎日本進修進修，竟然要從頭再學起！？真的假的開玩笑！？心深不忿，決定還是親自去學校8下究竟是什麼玩法？
去到學校，眼見近2百位的學生名單，當中大概也只有十分之一的人不是初班1。感覺又好像好了點！哈哈！我同房跟我說，她當時班上也有考了n3的同學，感覺就好像學校都故意把所有人都編到最低的班級，讓我們從頭學起。聽完了，就覺得反正在日本人眼中，我的日語也不真的是初級1！？反正頭都洗濕了，那就繼續唄！
－－－－－－－－－－－－－－－－－－－－－－－－－－－－－－－－－－－－－－－－（寫於11／1／2018）

開學禮

今日係學校的開學禮。由於學校應該無大禮堂，所以就係附近的一間酒店的hall舉行。
早上，學校安排了講不同語言的翻譯老師去各個宿舍接新生。這個開學禮只是辦給新生的，大概二百人吧，老師說1月生比較少。同房也有告訴我，她十月的時候有過千的新生呢！學校的整體安排都讓人好舒服，完全不會因為語言不通而感到無助，這一點是值得表揚的！
開學禮很讓我有中學的感覺，其中一個原因是因為當中安排了交通安全負責的警察來講座，就像中學聽的一樣。不知道大家有沒有這樣的中學回憶呢？
開學禮過後，就到說明會了。那是把不同語言國籍的同學都分到講相關語言的翻譯老師，然後老師就把我們帶到所屬校舍，講解特別注意事項和分班試事宜等等。
下午，我再次回到學校參加分班試，感覺試卷也不算是特別的難，可也不算是易如反掌。總之我就正常發揮吧！不過就有一篇作文，感覺不特別計分，因為評分紙上沒有作文分數的一欄。但作文的確是最考功力的！我也沒什麼能力寫好，就隨便寫了幾句就算了。反正多寫一定多錯！大部分的同學也很快做完離場，我不特別快，就早15分鐘走。心想應該也至少答對一半吧！？明天就知道分班了！希望不要是最初班就好了。
－－－－－－－－－－－－－－－－－－－－－－－－－－－－－－－－－－－－－－－－
（寫於11／1／2018）

獨立的第一天

今日係我正式自己一個人日本留學生活的第一天。沒有男友陪的第一天就下起雨來了！我睡到下午2點（無計喇，我眼光光到早上7點先訓得著），洗完澡3點。之後就早餐時間（我roommate同我同一樣時間表＝＝）。好懶洋洋的日本留學生活呀！點解就同我想的有些出入呢！？不理了！我今日無論如何都要出去！我仲未買齊日用品呢！

就係咁，4點就自己一個人hea hea地咁出左去上野100円店，仲買左好多野，超抵超開心！之後本打算吃個松屋再返歸，途中，有個廿幾三十歲既日本男人搵我傾計，衣著整齊得體，不停話請我飲野，追左好耐，我梗係嚇到不停話約左朋友先走，佢仲追過黎，話只要10分鐘，飲杯野就好！痴線！我不停講：すみません、バイバイ！之後就好快咁跑走了。搞到我吃唔成松屋，因為要趕住離開呢個地方。唔知係咪我疑心太重，有人無拉拉咁約我我就一定會當佢壞人。但係男人咁樣係條街度公然聊女仔，都應該有d怪怪的呱．．．？比人拒絕都好正常。

我衝到去車站之後，突然發覺我張水果卡唔見左！？該不是剛才果個日本人原來唔係為左聊我，而係為左偷野呱！？不過要偷點解佢唔偷係同一個袋既電話？定係佢約唔成我所以要報復就偷左張卡！？定係其實只係我唔小心整跌左＝＝？不得而知了！我只知道我又損失了一筆了！剛剛去100円店省的＄都唔夠了！！！搞到我晚上要吃杯麵！會不會太慘！？
不管了！要早點睡了，明天開學禮要早起。
－－－－－－－－－－－－－－－－－－－－－－－－－－－－－－－－－－－－－－－－（寫於10／1／2018）

捨不得你

今日係我男友陪我留係日本既最後一日喇！之後就要學識獨立d！早上佢幫我搬了我的行李入宿之後，就一齊去左酒酒井outlet 買野。一日就係過得咁快！明明係夜晚既10點機，點解時間就過得咁快，點解就咁快要分開！？嗚嗚．．．成日口講話好堅強，點知最後都仲係哭了！我好唔捨得要分開咁耐！不過都是自找的！＝＝一齊咁多年第一次分開咁耐！喊了一陣子就沒了。嗯！你好快又黎探我了！

晚上返到宿舍，同roommate傾左陣計，感覺也幾好相處的。沒多久就就寑了，不過就是睡不著。一直眼光光．．．

－－－－－－－－－－－－－－－－－－－－－－－－－－－－－－－－－－－－－－－－（寫於10／1／2018）

心驚驚

今日係我地呢個旅程的其中一個重心！就係玩maricar！！yoyo！！
之但係今日出師不利，一出門就無帶電話！是但喇！反正我有人肉gps，有無電話都一樣！
我呢塊車牌今日第一次要出埸了！！！不過我就係好緊張！好驚！畢竟考左車牌都應該5－6年了，雖說是1 take pass，但就此以後就無坐過司機位！所以我真心好驚！一樣野要你做而你完全唔享受之餘仲要好驚的，咁不如唔好做！不過，我都依然嘗試走出comfort zone試下唔同野嘛！反正有人同我講過即使完全唔識揸車既人都可以一玩上手，更何況我原理上應該係識既呢！
一開始，有個外國教練教左我地點操作架車，我基本上都聽到7成喇！但一坐上車，應該得返2成野係記得，感覺有如揸大膽車！！到正式駛出馬路，真係不得了，我基本上係亂黎，又無打燈，又左搖右擺，最後仲撞倒人地d工程road block＝＝好彩只是稍稍撞到歪了，唔太嚴重。我都無受傷。日本人仲好友善咁同我講：  大丈夫！教練就怕我受傷！不停同我講：Be careful!It's for your own safety!然後同我移好d road block同我架車！我其實好驚！不過仲要繼續。之後發覺真係開得太快了，又不停有車超前你。今日明明係星期六既早上，教練話交通都算好順暢架，點解我就唔覺既！？我自覺再玩落去會出事，我唔想危害交通安全！大家都要平平安安！為左個game邊個受傷都不好，所以我就中途退出了！害大家等了我10分鐘真不好意思！sam本身想同我一齊走，我就叫佢留低玩埋我果份！佢事後仲同我講：以後我做你司機就好了！我同自己講，我如果唔重新練過d技術，我一定不會駕上馬路，大家放心好了！
不過剛才提到出師不利，我無帶電話，無左gps亂走出去，之後又同唔返sam聯絡，所以最後我都係走返酒店拎電話了！

晚上，我地去左夾公仔！輕鬆ko一隻小兔！之後夾小布甸，夾到偏離好遠，但又入晒＄＄入去未玩晒，點算呀！？所以就搵左個店員幫手adjust一下，點知佢就放左一個超好的位置，故意讓我們夾到的，當然之後我地三兩野就夾多一隻了！今日就發覺日本人實在太好了！東京的人也真不太差的呀！好開心多左兩個小roommates！！以後多多關照，好好相處喇！
－－－－－－－－－－－－－－－－－－－－－－－－－－－－－－－－－－－－－－－－
（寫於10／1／2018）

入學手續

今日係我辦入學手續的日子！不過時地人我都未知＝＝為什麼呢？！就是因為我聯絡這邊老師的時候佢地原來已經放緊幾日連續的長假期，真好！放假完全不用理會工作上的事情！所以，我一直等到今天早上9點幾佢地先開工，我先知道我應該點做。其實過程很順利，亦很簡單舒服！今日仲車左我去hall度。真好，住3樓尾房，夠安靜！第一次見roommate，好緊張呀！要同居3個月的呀！如果是越南人怎麼辦？如果是奇怪的人又點算？如果很不友善的呢？溝通不了的呢？好怕呀！？一敲門，一開門，一見面，自我介紹！哦！原來是西安人。起碼可以談上兩咀！希望大家以後好好相處吧！不過我呢幾日暫時唔會係宿舍訓，要跟小男友先去玩樂一下！以後再慢慢摸清大家吧！呵呵～
－－－－－－－－－－－－－－－－－－－－－－－－－－－－－－－－－－－－－－－－（寫於10／1／2018）

東京・你好嗎

今日係我要正式出國的日子！成日都話唔要red eye，偏偏次次買機票都係呢d時間！無法子喇，就得呢樣就就唔到果樣，始終都係要屈服一下！

今次我男友送佛送到西，就拎左幾日假，同我一齊黎辦入學準備，當然最重要係黎一齊玩同買日用品什麼的。不過姐姐我真的開始老了，red eye完真係無咩力去玩同買，見到好多野係好靚，不過就是提不起勁。仲要福袋都沒什麼剩了，得返個cecil mcbee，舊年我都有買，今年仲有就買返個，點知返去拆左發覺無去年的靚，大概就係因為咁所以今日都仲有貨呱！？

唔理了，反正姐我真的累了，就早一點點回酒店了！明天更要辦入學手續呢！不過我時間地點都未來搞清楚，怎麼辦？明天才算唄！
－－－－－－－－－－－－－－－－－－－－－－－－－－－－－－－－－－－－－－－－
（寫於10／1／2018）

2018來了

我的2018年對我來說特別有意義！因為我竟然可以去完成我的兒時留學夢！
很多人說我很勇敢去追夢，其實是我很幸運遇到很支持我的家人和朋友！我家人沒有因為我辭工出走而給我壓力；特別是我男友沒有因為我要與他小別而不滿，更在思想上，行為上和金錢上都給予無限量支持！我真的是太幸福了！不過與其說這是追夢，倒不如說我是想去玩樂：）哈哈！祝一切順利！
我的2018目標：
1．好好學日文
2．稍稍減磅至健康平均水平
3．家人和自己身體健康
4．年尾前找到一份合適的工作
－－－－－－－－－－－－－－－－－－－－－－－－－－－－－－－－－－－－－－－－（寫於10／1／2018）