告別2017

仲有2日半就到新的一年！新的開始又快到了！你有晒計劃了嗎？

我仲記得我舊年倒數2017年既時候我有講過2016係好多小轉變的一年，當時轉左幾次ward工作，以為好難適應，卻又過得比想像好！原來時間過得咁快！一年又過去了，世事變得好快，快到你都估唔到又追唔切！今年對我黎講最大既轉變係我辭左一份個個都認為係好穩定既工作，而我反而覺得穩定其實唔係只係睇收入，呢份工作其實對我身心靈黎講都唔穩定。可能我仍算年輕，無太大負擔，所以先可以咁口響。如果到我要組織一個家庭，也許身心靈都不再重要了＝＝

最近睇左好多醫療的新聞，流感高峰期其實應該未正式開始，不過見到醫院入住率已經爆到咁．．．我曾經以為我會好慶幸我逃離左醫院最忙的日子，本應這是我曾經身為小護的小確幸，但卻是我作為香港市民的悲哀！在現今醫療制度，著重繁重瑣碎多餘的文件工作，醫護人員人手比例嚴重不足，加上有時醫患互相猜疑，對病症的無能為力好多時都被演繹成醫療失誤！我唔會否認當中的可能性，只係有時會覺得好多事都是吃力不討好！大家用心做好每一件事，卻得不到病人信任，高層也不會有仁政。可憐前線的醫護，可悲的病患市民，可笑的膠層。
－－－－－－－－－－－－－－－－－－－－－－－－－－－－－－－－－－－－－－－－

轉下話題先，update下過去既呢個幾星期既事。忙住同唔同人慶祝Xmas，PH果4日去左個小旅行，感覺非常滿足，即使我地去既地方一d都唔好玩，但係最重要可以同喜歡的人一齊放假，呢種日子好難得！我真係好希望成日都可以一齊放假！

早幾日收到法庭傳票叫我去做陪審員，我曾幾何時好想做！不過佢竟然係最唔恰當的時候搵我（一黎我呢期好多小事處理緊，二黎我到時已經唔係hk）＝＝搞到我有d不知所措！anyway，好彩我有個好好的男人係身邊，三兩野就幫我解決晒所有煩惱！我又可以安心出發了！

幸福會肥嗎？

一直都係偏瘦身形既我，中學時期得體重大約三十幾kg，個個都話我太瘦無吃飯減肥之類。。。以為得天獨厚，基因就是唔會肥。大家都唔知我中學時邊溫書邊零食糖水宵夜etc。我當時唔會話驚肥，至怕肚生蟲，或者會怕吃到糖尿姐！當時我有句名言比我男友串到而家：到時糖尿病都有得醫喇！洗咩怕喎！點知到而家都仲係未有更好既醫治＝＝
升到大學，開始覺得好relax，由於一直以來的讀書目標都係為左升大學，既然都升到，就好似無左人生目標咁，另外又開始正式學人拍拖，就係咁開展左我吃喝玩樂的大學生活。仲要無PE堂喎，連僅有果少少運動都無得做，體重直線升左5kg，嚇死寶寶！我唔係唔識肥既咩！點解搞成咁！不過，身邊朋友話我呢個身形睇落健康好多，我又覺得好似幾有道理，又好好彩地keep住點吃都無再肥多左，於是就無特別減過肥，亦無減過磅。
到左工作果3年，可能因為太辛苦又高壓，日日企十個八個鐘，想肥都唔係咁易架！
而家失業呢2個月，生活好頹廢，多吃貨，又宵夜，少運動，遲睡覺．．．我都知一般人咁會肥，不過我都依然以為自己係唔識肥體質，所以失業後一直都無上過磅，亦唔會知自己有無肥左。點知。。。殘酷的事就發生了！！！琴日男友自己上磅，發現自己變左隻豬！！！哈哈！笑完一輪到我又好奇磅下！下！！！！！我接受唔到囉！！一直以為個磅壞左！捉左d屋企人上去驗證下！當然個磅係無問題喇！但我有問題囉！！！姐我只不過放左2個月小休！竟然肥左3－4kg！！！我實在接受唔到呀！！！我生活係咪太嘆喇！？點解會搞成咁！？雖然體重仲未到5字頭，但再咁落去都不遠已。我真係唔敢想像自己去到日本會唔會變左隻大豬！雖然男友話養肥左我好開心，呢d叫幸福肥！但幸福都有好多種架！幸福瘦唔得嗎？幸福健康如何？不過如果幸福真的會肥，我還是想跟係一起幸福落去！（臉紅了！）

我要開始學人健康飲食，等我整定個營養餐單去日本先；為左做多d運動，我要多d去shopping！哈哈！問題好像解決了！先冬眠一個！晚安！

無業・日記

由我正式辭左份工到今日為止已經剛2個月了！嘩～之前剛剛失業的時候總覺得時間過得好慢，日日好似無所事事。點知眨個眼時間又好似過得快得濟！仲有半個月就要出發了！
就住點解我要早兩個幾月辭職嘆世界，而唔係工作到最後一分鐘賺到最盡先去日本慢慢揮霍，我都有幾個小原因，不過最終結果好像有點兒落差。（排名有分先後）
1．溫好d日文，考好個n3先出發。（點知失業開頭hea得太緊要，唔係太適應以前日日好忙碌咁返工，家下突然叫停我無野做，潛藏左好幾年既懶惰因子得到釋放，咁就無好好用功了！＝＝）
2．想去下旅行！（點知發現如果撇除去日本，好像突然少左好多適合單人行的地方！最終暫時都只係同我男人快閃過兩日韓國，為左吃一隻雞！再加上前果排每個禮拜有一日要上日文對策班，又有一日要跳kpop，所以去唔到long trip！要不然我可能早就失蹤了！呵呵～）
3．逃避winter surge，逃避無聊醫療政策！（其實只要我仲有打算繼續做呢行，呢d野真係避得一時，唔避得一世，惟有避到就避喇！）
4．想放2個月假好好休息下。（無野做唔算係最好既休息！反而一早計劃定去做自己想做的事，其實應該唔會覺得勞累！）

當大家都以為我必定所有事情都準備充足先遞紙辭職，然後就快活地飛到日本扮學生妹！哈哈！說出來都有點怕怕！在我辭職的那一刻，我也不過只是交了日本學校的申請表，僅此而已！直到我last day返工果日（即兩個月通知後），日本學校果邊都仲係無任何回音！我當然有追問過agent，不過我也相信我的agent老師，所以之後就沒有深究太多。學校一直到11月尾先正式出收條收取學費及宿舍匯款。由我報名到交學費整個過程有成3－4個月。當然，聽agent講如果最快的話也可以一星期內完事，只不過我比較早報名而已。
住宿方面其實有好多選擇，只不過為了方便起見，我選擇了住學生宿舍。想一再回味大學時住hall的感覺，亦覺得住hall先至最有做學生的感覺！學生宿舍方面有3個選擇，包括1．最近學校但費用最貴的女生單人房宿舍；2．距離學校少於10分鐘腳程的雙人房宿舍；3．距離學校十多分鐘單車程或鐵路程，但費用相對較經濟的雙人房宿舍。就此，由於我只是去3個月，想輕輕鬆鬆上學去，又想多d私人空間，多付少少租金也是可以的，當然毫無疑問地依次選擇了1，then2，then3＝ ＝！點知。。。。。。。。琴日終於出左hall既派位結果：係3呀！！！！！竟然係3呀呀呀！！！想哭了！唔想每日搭車返學！！又唔知會遇到個點既室友！要同住3個月架！突然好多挑戰！又興奮，又緊張，但又好期待！yo！希望一切順順利利喇！我到時會再同大家報告一下日本小生活，小趣事！一齊期待下喇！

偷懶了

原來有成個幾月無寫過近況喇！哈哈！
之前好有雄心壯志咁話青春不留白！點知辭左職之後就大部分時間都係度虛度光陰！原來，日日無咩目的咁過日子真係好難捱！開始好後悔太早辭職！原來我都係一個幾鐘意返工搵自己存在價值的人！不過，話就係話自己hea，我倒是做左d自己平時唔會做既事。就係去左學跳左一首完整的kpop（love whisper）！！完全無跳舞天分的我竟然去左學跳舞！仲要係高難度的舞（對我黎講）！由上完第1堂就自知路途艱鉅，準備放棄之際，點知因為同行者唔比我quit，所以硬著頭皮學到第5堂！呼～真係世上無難事！！哈哈！我而家覺得好有滿足感！跳出comfort zone去完成一件事，比起完成自己擅長的事更值得自豪！所以，我要多d試下離開安全區，試多d平時唔會做但又對自己有益處的事！咁先對得住自己的青春！
另外，我過去的11月原本就打算咪下書去考12月頭既JLPT N3，說來慚愧，明明都讀左3年，上年年頭考fail左，之後就無再讀日文了。無繼續唔係因為fail，而係因為工作太辛苦，令我無精力再繼續進修落去。今次早左咁多辭工，係因為想留多d時間溫書，點知就因為拋低書包太耐了，好難集中到，所以。。。溫書計劃就告吹了！今次第二次考n3架喇！明明就唔係好難！點解又係無信心pass＝。＝如果要再考，真心覺得無面見人了！算了，都過去了！之後去日本努力返就好了！期待我的日本留學日誌。。。
講下又諗下，突然覺得我的11月都唔算太虛耗姐。。。

身分轉換

今日對我來說是一個特別的日子。

三年前的今天，是我學生八達通身分失效前的最後一天，雖然當時應該早己不再是學生，但學生八達通身分就一直陪伴我到10月31日。當時剛踏入社會做事約兩個多月，做了一份與大學讀的學科有關的工作，卻不是我的理想的工作，壓力亦很大，不過倒是挺有意思的！

一直做著一份自認為自己不喜歡的工作，原來已經三年。三年內，其實也掙扎過好幾次要辭工，最終還是約定了自己，給予一個三年期限，既可拿到約滿酬金，又可以有足夠的思考時間空間好好為前路打算。

三年過去了，今天是我早前在辭呈上填下的最後工作日期。與三年前一樣，今天不是我離開工作崗位的第一天，卻是我結束了這三年來在工作上那身分的最後一天。萬般滋味在心頭，離開了反而會變得清醒，原來我從來都不討厭我的工作，只不過有時制度上的限制，令到工作壓力大得沒有意義。離開透透氣，我的世界也許會不一樣了。

不過，這一次的離開並不是為了想逃離工作，而是為了追隨我的小小夢想。從小到大都很希望自己能有一次留學的機會，如今總算有機會做到了。不過我的小小留學生涯要到1月才正式展開，現在還是我好好準備的時候呢！想看留學小故事還要多等一點點時間了。呵呵～

三年前我由學生身分變了一個沒有乘車優惠的上班的小職員，今天我又由一個小職員走回到做一個準備要開學的學生了！世事真的變幻無常呢！

無一墨名字由來

說了也有不止十年了，終於為無一墨大師開了一個網站。

中學時期的我也曾是一個不時會閱讀的好學生，尤其是那些養份不高的愛情小說。不時幻想讓自己當一下女主角，日日夜夜把故事情節套用到身邊的人身上，彷彿自己經歷了好幾萬種不同的人生，歷盡風雪。不過說到底，悲情小說才是我的茶，每每把小說創作到有淡淡的遺憾，那種愛情的淒美，那種揪心的痛，才是愛情小說裡最引人入勝的地方。

一個喜歡愛情小說的人為什麼要叫自己做無一墨？那就要數算到自己曾經讀到的菩提偈的節錄：「本來無一物，何處惹塵埃」。我就不在這裡詳細解釋句子內容了，因為我也沒有那種大智慧。我不過是很喜歡「無一物」這個意思，掙扎了好一陣子以後，就發覺與其說自己是「無一物」，「無一墨」可能更貼切，就是說自己胸無點墨，沒墨水咯。

其實無一墨大師還在沒有出道的時候就已經退下來了，這個網也不過是這位大師想分享生活點滴給身邊朋友，所以就開了一個戶口作隨筆，寫寫生活點滴，就這樣而已。所以不用期待會有愛情小品的出現哦！